Astana ákimdiginde shahar basshysy Baqyt Sultanovtyń tóraǵalyǵymen otyrys ótti, dep habarlaidy QazAqparat.
Elorda ákimdiginen málim etkendei, keńes barysynda qalanyń tynys-tirshiligine qatysty máseleler talqylandy.
Úlestik qurylysqa qatysýshylardyń máseleleri boiynsha qala ákiminiń birinshi orynbasary Sergei Horoshýn aityp berdi.
«Ótken aptada biz «Azbýka jilia» nysandaryna qatysty jaǵdai boiynsha tolyq málimet bergen bolatynbyz. Aldaǵy eki aptada biz «Aisanam de liýks» jáne «Sadovye kvartaly» turǵyn úi keshenderi boiynsha saraptama qorytyndysyn alamyz dep josparlap otyrmyz. Sonymen qatar, osy nysandarǵa qatysty qarjylyq modeldi bekitý jáne konkýrsty jariialaý materialdary daiyndalýda. Problemaly «Komsomolskii» nysanyna qatysty saraptamanyń qorytyndysyn alý aqpan aiynyń ortasyna josparlanǵan. Aldaǵy aptada «ISK ASI Kotliarova S. V» kompaniiasynyń nysandaryna qatysty jumystar júrgiziletin bolady. Basqa nysandar boiynsha jumystar josparǵa sai júrgizilip jatyr», - dedi S. Horoshýn.
Densaýlyq saqtaý salasyndaǵy, sondai-aq elordada uiymdastyrylǵan muz qalashyqtary men muz aidyndaryndaǵy qazirgi jaǵdai týraly elorda ákiminiń orynbasary Ermek Amanshaev baiandap berdi.
«Meditsinalyq uiymdar Biryńǵai distribiýtormen 2019 jylǵa dárilik zattardy jetkizýge oferta sharttar jasady, preparattardy jetkizý bastalyp ketti. Jyl basynda patsientter dárilik zattarsyz qalmaýy úshin 2018 jyldyń jeltoqsanynda barlyq patsientterge 3 aiǵa jetetin preparattar berildi», - dedi E. Amanshaev.
Onyń aitýyna qaraǵanda, 26 qańtardaǵy jaǵdaiǵa sáikes densaýlyq saqtaý máseleleri boiynsha rezonanstyq jaǵdailar bolǵan joq. Esepti aptada IKomek «Qalalyq monitoring jáne jedel áreket etý ortalyǵyna» 101 shaǵym túsken.
«Barlyq túsken shaǵymdar qaralýda, olardyń árqaisysy boiynsha sharalar qabyldanady. Kelip túsken shaǵymdardyń basym bóligi birden sheshiledi», - dedi Amanshaev.
Qala biýdjetiniń oryndalýy barysy, qabyldanǵan obektilerdi qalanyń kommýnaldyq menshigine alý, sondai-aq memlekettik satyp alý josparynyń oryndalýy týraly qala ákiminiń orynbasary Asqar Ámrin málim etti.
Qala ákiminiń orynbasary Malika Bekturovanyń sózinshe, Astanada azyq-túliktiń negizgi túrleriniń baǵasy turaqty.
Qaladaǵy kriminogendi jaǵdai jáne quqyqtyq tártipti qamtamasyz etý boiynsha qolǵa alynǵan sharalar boiynsha esepti politsiia departamentiniń bastyǵy Marat Qojaev berdi. Onyń málimetinshe, qaladaǵy jaǵdai turaqty. Ótken aptada 479 qylmys tirkelgen. Bul aldyńǵy aptamen salystyrǵanda 41 qylmysqa az. Aýyr dene jaraqat alý men avtokólikti urlaý oqiǵalary tirkelgen joq, buzaqylyq kórsetý oqiǵalarynyń ósimine jol berilmei, tonaý sany azaiyp otyr.
«Sergek» kesheni arqyly bir apta ishinde 8 628 (56,6 mln. teńgege ) quqyqbuzýshylyq tirkelip, óńdeldi. Videobaqylaý kameralarynyń kómegimen 12 qylmys, 805 ákimshilik quqyqbuzýshylyq anyqtalyp, 62 qylmys «izi sýymai» ashyldy. Tústi metaldar qabyldanatyn oryndardy tekserý jumystary jalǵasýda. 51 pýnkt tekserilip, (Baiqońyr-17, Sary arqa-18, Esil-16), metall jinaýmen jáne metall qabyldaýmen ainalysatyn 25 tulǵa ákimshilik jaýapqa tartyldy. Liýkterdi urlaý oqiǵalary tirkelgen joq.
Qalany aldaǵy gazdandyrý barysy týraly Otyn-energetikalyq kesheni jáne kommýnaldyq sharýashylyq basqarmasy basshysy E. Tóleýov baiandady. I kezektiń júzege asyrylý merzimi 2019 jyldan 2023 jylǵa deiingi aralyqta qarjylandyrý bólinýiniń shamasyna bailanysty josparlanyp otyr.
2025 jylǵa deiingi densaýlyq saqtaý infraqurylymyn damytýdyń biryńǵai perspektivalyq josparyn iske asyrý barysy týraly qoǵamdyq densaýlyq saqtaý basqarma basshysy Qamaljan Nadyrov aitty. Josparda 9 aýrýhanalyq uiymdy biriktirý jolymen tórt kópbeiindi qalalyq aýrýhana jáne meditsinalyq psihologiialyq densaýlyq ortalyǵyn qurý qarastyrylǵan. Budan bólek, emhanalardyń 20 minýttyq aralyqta ornalasýyn jáne jalpy qaraityn dárigerge túsetin júktemeni azaitý maqsatynda emhanalar jelisin qurý tujyrymdamasy ázirilgen. Onda qymbat emhanalardyń ornyna shaǵyn dárigerlik ambýlatoriialardy ashý qarastyrylǵan. Bul joba «Qoljetimdi dáriger» ataýyna ie boldy.
«Osyǵan bailanysty, atalǵan jobanyń áleýmettik mańyzdylyǵyn eskere otyryp, Biryńǵai perspektivalyq josparda kózdelip josparlanǵan 11 emhana qurylysynyń ornyna 51 dárigerlik ambýlatoriia ashý boiynsha ózgerister usynamyn», - dep atap ótti Nadyrov.
«Tsifrlyq Qazaqstan» memlekettik baǵdarlamasyn júzege asyrý aiasynda barlyq meditsinalyq uiymdar internet jelisine 100% qosylǵan. Barlyq mektepterde keń jolaqty internet bar. Balabaqshaǵa kezekke qoiý jáne olarǵa joldama berý, 1-synypqa qabyldaý, kolledjderge qabyldaý avtomattandyryldy.
