Parlament Senatynyń jalpy otyrysynda depýtat Murat Baqtiiaruly máslihat hatshylary men tekserý komissiiasynyń mártebesine qatysty másele kóterdi, dep habarlaidy QazAqparat.
«Bizdiń depýtattyq saýalymyz kópten beri aitylyp, biraq osy kezge deiin sheshimin tappai kele jatqan elimizdegi aýdandyq, qalalyq jáne oblystyq máslihat hatshylary men tekserý komissiiasynyń mártebesine qatysty bolmaq. Bizder taiaýda óńirlerde issaparda bolǵanymyzda jergilikti máslihattardyń mártebesin kóterý boiynsha jumystarda áli de sheshimin tappaǵan máselelerdiń bar ekeninine kýá boldyq. Atap aitqanda, Úkimettiń 2021 jylǵy maýsymdaǵy qaýlysyna orai, jergilikti deńgeide qyzmet atqaratyn memlekettik qyzmetshilerdiń jalaqysy 2 eseden artyq kóterilgen, alaida barlyq deńgeidegi máslihat hatshylarynyń eńbek aqysy sol burynǵy qalpynda qalyp qoidy.
Osy oraida aita ketý kerek, mundai jaǵdai 2016 jyly memlekettik qyzmetshilerdiń jalaqysy kóterilgende de oryn alǵan edi.
Sonymen qatar, «Sybailas jemqorlyqqa qarsy is-qimyl týraly» Zańyna sáikes, máslihat hatshylary memlekettik biýdjet esebinen qamtylǵan barlyq organdar úshin qyzmetkerlerdiń eńbegine aqy tóleýdiń biryńǵai júiesine sáikes jalaqy alyp, máslihat apparatynyń memlekettik qyzmetine tolyq jaýapty bolǵanymen, memlekettik qyzmetshi bolyp tabylmai, memlekettik fýnktsiialardy oryndaýǵa ýákilettik berilgen tulǵa retinde qaralady», - dedi Murat Baqtiiaruly Úkimet basshysy Asqar Maminniń atyna joldaǵan saýalynda.
Onyń aitýynsha, máslihat hatshylary memlekettik saiasi jáne memlekettik ákimshilik laýazymdyq deńgeiler men fýnktsionaldyq bloktar boiynsha bóliniske engizilmegen. Sondyqtan memlekettik saiasi jáne ákimshilik qyzmetshilerdiń laýazymdyq ailyq aqylarynyń shemasyna da enbegendikten jalaqysy kóterilmei qaldy. Mysaly aýdandyq deńgeidegi máslihat hatshysy aýdandyq máslihat apparat basshysynan eki ese, bólim basshysynan 50% tómen jalaqy alady. Al oblystyq máslihat hatshysy oblystyq máslihat apparat basshysynan 50% tómen jalaqy alady. Máslihat hatshylarynyń máslihat apparat qyzmetkerlerinen tómen jalaqy alýy, laýazymdyq ierarhiia qaǵidalarynyń saqtalmaýyna ákelip soǵýda.
«Dál osyndai jaǵdai tekserý komissiiasy tóraǵalary men tekserý komissiiasy músheleriniń jalaqysyna da qatysty oryn alyp otyr. Tekserý komissiiasy tóraǵalarynyń jalaqysy tek 33%-ǵa, tekserý komissiia músheleriniń jalaqysy17%-ǵa ǵana kóbeidi, al basqa memlekettik qyzmetshilerdiń jalaqysy eki nemese odan da kóp esege ósti. Bul rette tekserý komissiia músheleri óz ókilettikterine sáikes, jergilikti atqarýshy organdar qyzmeti tiimdiliginiń táýelsiz qorytyndysyn ázirleitinin atap ótken jón. Osyǵan orai, barlyq deńgeidegi máslihat hatshylary men tekserý komissiiasynyń mártebesin Qazaqstan Respýblikasynyń zańnamalarymen retteý týraly máseleni qarastyrýyńyzdy suraimyz», - dedi senator Premer-Ministrge joldaǵan saýalynda.
