Senator Nariman Tóreǵaliev Premer-Ministrdiń atyna joldaǵan depýtattyq saýalynda Batys Qazaqstan oblysynda ornalasqan ótkizý beketteriniń máselesin kóterdi, dep habarlaidy QazAqparat.
Depýtattyń aitýynsha, 2016 jylǵy qazanda ótken Qazaqstan men Resei arasyndaǵy HIII óńiraralyq yntymaqtastyq forýmynda Elbasy elimizdiń Úkimetine Qazaqstan-Resei shekarasyndaǵy baqylaý-ótkizý pýnktterin jańǵyrtý, sondai-aq «Fomin» jáne «Molodost» jeńildetilgen ótkizý pýnktteriniń mártebesin ekijaqty avtomobil ótkizý pýnktterine ózgertý týraly tapsyrma bergen bolatyn. Osy sharalardyń barlyǵy 2018 jyldyń 15 jeltoqsanyna deiin júzege asýy tiis edi.
Senator atalǵan tapsyrmanyń oryndalmaýyna bailanysty depýtattar bul máseleni birneshe ret kóterip, depýtattyq saýaldar joldaǵanyn atap ótti.
Nariman Tóreǵalievtiń sózine qaraǵanda, bul máseleni sheshý ótkizý beketterindegi uzyn-sonar kezekterden arylýǵa jáne óńirdiń ekonomikalyq ósýine jańa serpin berýge kómekteser edi.
«Jánibek aýdanynyń «Jánibek-Vishnevka» ótkizý pýnktine kóp jaqty halyqaralyq ótkizý pýnkti mártebesin, al Bókei Ordasy aýdanynyń «Molodost-Verhnii Baskýnchak» jáne Kaztalov aýdanynyń «Fomin» ótkizý pýnktterine ekijaqty avtomobil ótkizý pýnkti mártebesin berý máselesiniń sheshilýine jáne Ónege-Bisen-Saiqyn respýblikalyq mańyzy bar tas jolyn Saiqyn-Shońai-Molodost (50 km) shekara beldeýine deiin uzartyp, «QazAvtoJol» UK» AQ esebine berý arqyly jergilikti mańyzy bar joldan respýblikalyq mańyzy bar jol mártebesine aýystyrýǵa yqpal etýińizdi suraimyz» - dedi depýtat Senattyń jalpy otyrysynda.
