Senatta Halyqaralyq qatynastar, qorǵanys jáne qaýipsizdik komitetiniń músheleri QR Qorǵanys ministrliginiń basshylyǵymen kezdesti.
Kezdesýde «Keibir zańnamalyq aktilerge turǵyn úi qatynastary máseleleri boiynsha ózgerister men tolyqtyrýlar engizý týraly» QR zańynyń júzege asý barysy qaraldy.
Komitet tóraiymy Dariǵa Nazarbaeva elimizde alǵash ret áskeri qyzmetkerlerdi turǵyn úi tólemderi mehanizmi arqyly baspanamen qamtýdyń jańa modeli paida bolǵanyn eske saldy.
«Ózderińiz bilesizder, baspana alý problemasy, ásirese áskeri qyzmetkerler arasynda árdaiym ózekti bolǵan, qazir de ózektiligin joiǵan joq. Úkimet áskeri qyzmetkerlerdi turǵyn úimen qamtýǵa baǵyttalǵan shara qabyldamaidy dep aitýǵa kelmeidi. Degenmen, qazirgi baspanany paidalanýǵa berý qarqyny turǵyn úi máselesin myńdaǵan otbasy úshin ashyq qaldyryp otyrǵanyn moiyndaý qajet. Osylaisha, olardy uzaq jyldar boiy kúttirip qoiady. Sondyqtan, áskeri qyzmetkerlerdi baspanamen qamtamasyz etýdiń jańa mehanizmi óte mańyzdy. Sebebi, olarǵa qyzmet etken kezinde óz úiin alý múmkindigi beriledi. Osylaisha, áskeri qyzmetkerlerdiń memlekettiń erekshe qorǵaýyndaǵy azamattar retindegi mártebesi rastalady», - dedi Nazarbaeva.
Dariǵa Nazarbaeva áskerilerdi baspanamen qamtamasyz etýge baǵyttalǵan zańnyń qanshalyqty tiimdi júzege asyp jatqanyn Qorǵanys ministrligi basshylyǵynan surady.
Senat 2017 jylǵy qarashada áskerilerdi baspanamen qamtamasyz etetin zań jobasyn qabyldaǵan edi. Oǵan sáikes, qyzmetkerlerge bólinetin turǵyn úi tólemderi birden bankterdiń arnaiy shottaryna aýdarylady. Osylaisha, baspanaǵa bólingen aqsha ustalyp ketpei, birtindep jinaqtalady.
