Parlament Senatynda Armeniia Respýblikasyna munai ónimderin satý jónindegi saýda-ekonomikalyq yntymaqtastyq kelisimi ratifikatsiialandy, dep habarlaidy QazAqparat.
QR Energetika vitse-ministri Áset Maǵaýovtyń aitýynsha, Eýraziia ekonomikalyq odaq músheleri arasyndaǵy munai jáne munai ónimderin jetkizý 2014 jylǵy 29 mamyrdaǵy EAEO týraly shartqa sáikes jekelegen ekijaqty kelisimmen retteledi.
2020 jylǵy 16 shildede Nur-Sultan qalasynda Armeniia Respýblikasyna munai ónimderin berý boiynsha saýda-ekonomikalyq yntymaqtastyq kelisimine qol qoiylǵan.
«Kelisimge sáikes taraptar Armeniiaǵa jetkizýge ruqsat etilgen taýarlar tizbesin bekitedi. Budan ári taraptardyń vedomstvolary tiisti hattama jasaidy. Sondyqtan, eger qandai da bir munai ónimi ruqsat etilgen tizimge kirmese, ony ákete almaidy. Budan basqa, taraptardyń quzyretti organdary jyl saiyn 1 jeltoqsanǵa deiin Qazaqstan men Reseiden Armeniiaǵa taýar óndirý, ishki tutyný, importtaý jáne eksporttaý balansyn jasaidy, iaǵni indikativti balans. Reseidiń Armeniiaǵa munai ónimderin negizgi jetkizýshi ekenin eskere otyryp, qazaqstandyq ónimderdi yqtimal jetkizý qaldyq printsipi boiynsha aiqyndalady. Bul kelisimde taraptardyń indikativtik balansynda kózdelgen kólemnen tys ónim jetkizýge tyiym salynǵan», - dedi Energetika vitse-ministri.
Eýraziia ekonomikalyq odaq elderi arasyndaǵy saýda eksporttyq keden baj salyǵyn tólemei, keden baqylaýynsyz júrgiziledi.
Kelisimde munai ónimderi saýdasynyń is júzindegi erekshe rejimi belgilengen jáne Qazaqstannan Armeniiaǵa munai ónimderin áketý kezindegi baqylaý tetikteri qamtylǵan.
«Osyndai tetikter artyq munai ónimderin Armeniianyń neǵurlym basym naryǵyna ótkizýge múmkindik beredi. Bul munai ónimderiniń ishki teńgerimine oń áser etedi jáne Qazaqstannyń sharýashylyq júrgizýshi sýbektileriniń túsimin arttyrady, sondai-aq Qazaqstannan munai ónimderin áketýdi retteidi jáne ishki naryqty qorǵaidy. Jetkizý sharttaryn kásipkerler ózara kelisim boiynsha derbes anyqtaitynyn atap ótken jón», - dedi Á. Maǵaýov.
Eksport boiynsha mámile shetel valiýtasynda, ádette AQSh dollarynda jasalady. Sondyqtan, qandai da bir táýekelder boljanbaidy.
