Ortalyq sailaý komissiiasynyń tóraǵasy Berik Imashevtyń tóraǵalyǵymen ótken jiynda QR Parlament Senaty depýtattyǵyna kandidattardy usyný kezeńiniń aiaqtalý boiynsha máseleler qaraldy, dep habarlaidy Ult.kz tilshisi QazAqparat agenttigine silteme jasap.
«Sailaý zańnamasy normalary aiasynda Ortalyq sailaý komissiiasy QR Parlamenti Senatynyń depýtattaryn sailaýdy uiymdastyrý jáne ótkizýge basshylyq etedi. QR Parlament Senaty depýtattaryn kezekti sailaýyn ótkizý is-sharalarynyń kúntizbelik josparyna sáikes, 28 mamyrda osy sailaýdyń birinshi kezeńi - kandidattardy usyný resmi túrde aiaqtaldy. Oblystarda, Astana men Almaty qalalarynda depýtattyqqa kandidattardy usyný óte belsendi júrgizildi. Barlyq aýmaqtyq sailaý komissiialary Ortalyq sailaý komissiiasyna aldaǵy sailaýǵa kandidattardy usynýdyń sońǵy qorytyndylary týraly aqparatty usynǵanyn atap ótkim keledi», - dedi B. Imashev.
Kelesi kezekte sóz alǵan QR OSK Sailaý protsesin uiymdastyrý bóliminiń meńgerýshisi Maqsathan Anapinniń aitýynsha, 28 sáýirden 28 mamyrǵa deiingi kezeńde respýblika boiynsha Parlament Senatynyń depýtattyǵyna barlyǵy 89 kandidat usynyldy. Salystyryp aitar bolsaq, 2014 jyly ótkizilgen Senat sailaýyna 88 kandidat, al 2011 jyly 96 kandidat usynylǵan eken. Osylaisha, Parlamenttiń joǵary palatasynyń depýtattaryn sailaý jónindegi sońǵy úsh sailaý naýqanynda usyný qorytyndylary boiynsha bir senator mandatyna ortasha alǵanda 5 úmitkerden keledi. Biyl kandidattardyń kóbi Astana qalasynda usynyldy - 9 adam, eń azy Shyǵys Qazaqstan oblysynda - 4 adam. Senatqa qazirgi sailaý barysynda ózin-ózi usyný quqyǵyn paidalanǵan kandidattar sany - 82. Bul rette máslihattar 7 kandidatty usyndy.
«Sondai-aq ótken sailaý naýqandarymen salystyrǵanda áielderdiń belsendiligi 2,6 ese ósti. Usynylǵan kandidattardyń ishinde 13 áiel. Al 2014 jyly 5 áiel, 2011 jyly 6 áiel usynylǵan edi. Onyń ishinde Astana jáne Almaty qalalarynda 7 áiel usynylyp otyr. Kandidattardyń ortasha jasy 51,9 jasty quraidy. Eń jas kandidat 30 jasta, úmitkerlerdiń ishindegi eń úlkeni 68 jasta», - dedi ol.
Onyń sózine qaraǵanda, kandidattardyń 26-sy injener, 21-i ekonomist, 10-y oqytýshy, 10-y zańger, 9-y agrarlyq salanyń ókilderi, 5-eýi dáriger, 2-eýi saiasattanýshy jáne 6-aýy basqa mamandyq ieleri.
«Óz kandidatýralaryn qyzmettegi 4 senator usyndy. Usynylǵandardyń ishinde 5-eýi máslihattar depýtattary, 35-i - kommertsiialyq qurylymdardyń qyzmetkerleri, 13-i - memlekettik uiymdar, kásiporyndar men mekemelerdiń qyzmetkerleri, 23-i - memlekettik qyzmetshiler jáne 7-eýi - qoǵamdyq uiymdardyń ókilderi», - dedi M. Anapin.
Aita keterligi, qazirgi ýaqytta Senat depýtattyǵyna kandidattardy tirkeý rásimi jalǵasýda. Ol 7 maýsymǵa deiin jalǵasady. Sailaý týraly zańnamaǵa sáikes sailaý komissiialary memlekettik organdarmen birlese otyryp, usynylǵan qujattardyń durystyǵyn tekserý boiynsha jumys júrgizýde. 28 mamyrdaǵy jaǵdai boiynsha oblystyq, Astana jáne Almaty qalalyq sailaý komissiialary Senat depýtattyǵyna 62 kandidatty tirkedi.
