Máýlen Áshimbaevtyń tóraǵalyǵymen Senat otyrysy ótti. Senat Tóraǵasy sóz basynda Memleket basshysy halyqqa arnaǵan Joldaýynda belgilep bergen basymdyqtarǵa nazar aýdardy.
Spiker biylǵy Joldaýda áleýmettik salaǵa basa mán berilgenin atap ótti.
«Memleket basshysynyń bastamasymen kelesi jyldan bastap eń tómengi jalaqy mólsheri ulǵaiady. Bul sheshim millionnan astam qazaqstandyqtyń ál-aýqatyn arttyrýǵa múmkindik beretini sózsiz. Sondai-aq, 2025 jylǵa deiin biýdjet qyzmetkerleriniń jalaqysy jyl saiyn 20 paiyzǵa ósip otyrady. Bul shara mádeniet qyzmetkerlerin, muraǵatshylardy, qoryqshylardy jáne biýdjet salasyndaǵy ózge de mamandardy qamtidy», – dedi Máýlen Áshimbaev.
Senat Tóraǵasy Memleket basshysynyń tapsyrmalary azamattardy alańdatqan ózekti máselelerdi sheshýge arnalǵanyn atap ótti. Bul tapsyrmalar aýyz sý, turǵyn úi, jaiylymdyq jer, densaýlyq saqtaý, bilim berý jáne biznes júielerin qoldaý siiaqty basymdyqtardy qamtidy. Munyń bári mańyzdy zańnamalyq ózgeristerdi qajet etetini belgili.
«Jyl sońyna deiin ulttyq qordy jáne biýdjetti tiimdi paidalanýdy kózdeitin qosymsha zańnamalyq túzetýlerdi qabyldaýymyz kerek. Sonymen qatar, ǵylym salasyn odan ári damytý men qoldaýǵa, aktivterdi tiimdi paidalanýǵa, aglomeratsiiany damytýǵa arnalǵan zańnamalyq sheshimder qabyldanady», – dedi Máýlen Áshimbaev.
Sonymen qatar ol aldaǵy ýaqytta Senat Joldaýda belgilengen basymdyqtardy zańnamalyq turǵydan qamtamasyz etý úshin júieli ári keshendi jumys júrgizetinin aitty. Soǵan bailanysty Palata depýtattary sarapshylar qaýymdastyǵymen, qoǵamdyq institýttarmen jáne basqa da múddeles taraptarmen birlesip, bilsendi jumys isteýdi kózdep otyr. Bul el Prezidenti jariialaǵan reformalardy tabysty iske asyrý úshin asa mańyzdy.
«Jańa reformalardyń basty maqsaty – azamattardyń ortalyq jáne jergilikti deńgeidegi sheshim qabyldaý protsesterine qatysýyn qamtamasyz etý. Osy baǵytta Memleket basshysy depýtattyq mandattardy bólý kezinde erekshe qajettiligi bar azamattar úshin arnaiy kvota qarastyrý qajet ekenin aitty. Jalpy, biylǵy Joldaýdy qoǵamnyń aldaǵy reformalar boiynsha suraqtaryna berilgen naqty jaýap dep qabyldaimyz», – dedi Senat Tóraǵasy.
Odan bólek, Máýlen Áshimbaev senatorlardyń parlamenttik kanikýl kezinde óńirlerde ótkizgen kezdesýleri men atqarǵan jumystaryna nazar aýdardy.
«Sizder parlamenttik kanikýl kezińde óńirlerde bolyp, halyqpen, qoǵamnyń bedeldi ókilderimen jáne jergilikti bilikpen kezdesýler ótkizdińizder. Sol kezdesýlerde kóterilgen máseleler de Palatanyń aldaǵy jumysynda eskerilýi qajet», – dedi Máýlen Áshimbaev.
Jańa sessiianyń alǵashqy otyrysynda Senat depýtattary Qazaqstan Respýblikasynyń «2014 jylǵy 29 mamyrdaǵy Eýraziialyq ekonomikalyq odaq týraly shartqa Qyrǵyz Respýblikasynyń qosylýyna bailanysty oǵan ózgerister engizý týraly hattamany ratifikatsiialaý týraly» zań jobasyn qarap, qabyldady.
«Qabyldanǵan ózgerister Eýraziialyq ekonomikalyq odaqqa múshe memleketter arasynda elektr energiiasyn jetkizýdiń jekelegen máselelerin sheshýge arnalǵan. Aldaǵy ýaqytta bul túzetýler Uiym aiasynda elektr energetikasy júiesin tiimdi paidalanýǵa oń septigin tigizedi dep senemiz», – dedi Máýlen Áshimbaev.
Sondai-aq, otyrys barysynda senatorlar birqatar depýtattyq saýal joldady. Áli Bektaev aýyl sharýashylyǵy maqsatyndaǵy jerlerdiń tapshylyǵyna nazar aýdarsa, Baqtybai Shelpekov Beineý-Shalqar avtojolynyń qurylysyna qatysty máseleni kóterdi. Senatorlar Asqar Shákirov pen Lázzat Súleimen turǵyn úi máselesine qatysty saýal joldady. Al Dana Nurjigitova mektep psihologtaryn daiarlaý jumysyndaǵy olqylyqtarǵa alańdaýshylyq bildirdi. Álimjan Qurtaev ejelgi Otyrar qalasyn jandandyrý jumystaryna kóńil bólý kerektigin aitty.
Budan basqa, Palata otyrysynda Senat depýtattary bir kúndik jalaqylaryn Jambyl oblysyndaǵy jarylys saldarynan zardap shekkenderdi qoldaýǵa arnalǵan qorǵa aýdarý týraly sheshim qabyldady.
