Senator Edil Mamytbekov zeinetaqy jinaqtaryn alýǵa tyiym salýdy Senat usynbaǵandyǵyn aitty, dep habarlaidy "Ult aqparat" QR Parlamenti Senatynyń baspasóz qyzmetine silteme jasap.
«Búgin birqatar buqaralyq aqparat quraldarynda qazaqstandyqtardyń túsinbeýshiligin týdyrǵan aqparat jariialandy. Iaǵni, Senat Májiliske zeinetaqy jinaqtaryn merziminen buryn alý týraly erejeni qaitarǵany habarlandy. Tipti bireý meniń sózime tikelei silteme jasaǵan. Alaida, men bul týrasynda eshteńe aitpaǵan edim. Bizdiń otyrys tikelei efirde Senattyń saitynda kórsetildi jáne qazir YouTube-te qoljetimdi.
Negizinde búgingi otyrysta senatorlar ekonomikalyq ósýdi qalpyna keltirý máseleleri boiynsha keibir zańnamalyq aktilerge engiziletin túzetýlerdi qarady. Osy atalǵan baǵytqa ózgerister men tolyqtyrýlar engizildi.
Azamattardyń zeinetaqy jinaqtarynyń bir bóligin turǵyn úi máselelerin sheshý jáne emdelý aqysyn tóleý úshin paidalaný quqyǵyna qatysty normalar ózgerissiz qaldy»,-deidi senator.
Atalǵan bólimge senatorlar eshqandai ózgeris engizbegen. Sondai-aq otyrysta qazaqstandyqtardyń zeinetaqy jinaqtaryn merziminen buryn alý múmkindiginen bas tartý týraly sóz bolmaǵan.
«Memleket basshysynyń tapsyrmasy boiynsha bizdiń azamattar zeinetaqy jinaqtarynyń bir bóligin kelesi jyldyń qańtar aiynyń alǵashqy kúnderinen bastap ala alady.
Senat qabyldaǵan ózgerister men tolyqtyrýlar Májiliske jiberildi. Olar tek zań jobasynyń jekelegen erejelerin naqtylaidy.
Budan basqa, buryn depýtattyq korpýs osy bólikte birqatar qosymsha sharalardy pysyqtaǵan bolatyn.
Eske sala keteiin, jaqynda senatorlar zeinetaqy jinaqtaryn merziminen buryn alý kezinde birjolǵy tabys salyǵyn ustap qalýdy emes, ony zeinetkerlikke shyqqanǵa deiin tóleýdi keiinge qaldyrýdy jáne adamdarǵa ony 16 jyl boiy bólip tóleýge múmkindik berýdi usyndy.
Osylaisha senatorlar zeinetaqy jinaqtarynyń bir bóligin merziminen buryn alý týraly normany qoldaidy. Bul týraly búgin Senat otyrysynda da aittyq», - dedi depýtat.
