Senat Spikeri Máýlen Áshimbaevtyń tóraǵalyǵymen Palata Biýrosynyń otyrysy ótti.
Onda depýtattar Senattyń aldaǵy 10 jeltoqsanda ótetin jalpy otyrysynyń kún tártibin talqylady, dep habarlaidy "Ult aqparat" QR Parlamenti Senatynyń baspasóz qyzmetine silteme jasap.⠀
Memleket basshysy buǵan deiin jaýapty hatshy institýtyn qysqartyp, sol arqyly ministrlerdiń jaýapkershiligin arttyrýdy tapsyrǵan edi. Ol úshin tiisti zańnamaǵa ózgerister engizý qajet. Soǵan bailanysty aldaǵy Senat otyrysynda depýtattar «Qazaqstan Respýblikasynyń Úkimeti týraly» Qazaqstan Respýblikasynyń Konstitýtsiialyq zańyna ózgerister engizý týraly» zań jobasyn qaraidy.⠀
Sonymen qatar senatorlar «Qazaqstan Respýblikasynyń keibir zańnamalyq aktilerine Memleket basshysynyń 2020 jylǵy 1 qyrkúiektegi «Jańa jaǵdaidaǵy Qazaqstan: is-qimyl kezeńi» atty Qazaqstan halqyna Joldaýynyń jekelegen erejelerin iske asyrý máselesi boiynsha ózgerister men tolyqtyrýlar engizý týraly» zań jobasyn talqylaidy.⠀
Odan bólek, Senat otyrysynyń kún tártibine «Qazaqstan Respýblikasy men Aziia Damý Banki arasyndaǵy Qaryz týraly kelisimdi (Jai operatsiialar) (COVID-19-ǵa qarsy kúres jónindegi belsendi sharalar men shyǵystardy qoldaý baǵdarlamasy) ratifikatsiialaý týraly» jáne «Qazaqstan Respýblikasy men Aziia Infraqurylymdyq Investitsiialar Banki arasyndaǵy Qaryz týraly kelisimdi (COVID-19-ǵa qarsy kúres jónindegi belsendi sharalar men shyǵystardy qoldaý baǵdarlamasy) ratifikatsiialaý týraly» zań jobalary da shyǵaryldy.
Sondai-aq, senatorlar aldaǵy Palata otyrysynda Májilis maquldaǵan «1999 jylǵy 8 qazandaǵy Erkin saýda aimaǵyn qurý týraly kelisimge qatysýshy memleketterdiń arasynda tasymaldanatyn taýarlardy kedendik resimdeýdiń jáne kedendik baqylaýdyń tártibi týraly kelisimge ózgerister engizý týraly hattamany ratifikatsiialaý týraly» jáne «Qazaqstan Respýblikasynyń Biýdjet kodeksine ózgerister men tolyqtyrýlar engizý týraly» zań jobalaryn qaraidy. ⠀
Álem boiynsha kóshi-qonnyń ósýine bailanysty eskertý sharalaryn jetildirý jáne sheteldikterdiń Qazaqstan aýmaǵyndaǵy zańǵa qaishy áreketteriniń ýaqtyly aldyn alý máselesiniń mańyzy arta túsedi. Osyǵan orai senatorlar «Qazaqstan Respýblikasynyń keibir zańnamalyq aktilerine adamdardy Qazaqstan Respýblikasynyń sheginen tys jerge shyǵaryp jiberý kezinde ustaý merzimderin retteý máseleleri boiynsha ózgerister men tolyqtyrýlar engizý týraly» zań jobasyn da talqylaidy.⠀
Budan basqa, Senat depýtattary Májilis maquldaǵan «Astyq týraly» Qazaqstan Respýblikasynyń Zańyna tolyqtyrýlar engizý týraly» zań jobasyn qaraidy.⠀
Biýro otyrysynda senatorlar Májilisten kelip túsken zań jobalaryn turaqty komitetterge bólip berdi.
