Búgin Senat Spikeri Máýlen Áshimbaevtyń tóraǵalyǵymen Palata otyrysy ótti.
Onda depýtattar «Qazaqstan Respýblikasynyń keibir zańnamalyq aktilerine memlekettik satyp alý, jer qoinaýyn paidalanýshylar men tabiǵi monopoliialar sýbektileriniń satyp alýy, bailanys, avtomobil kóligi jáne qorǵanys máseleleri boiynsha ózgerister men tolyqtyrýlar engizý týraly» zań jobasyn birinshi oqylymda qarady, dep habarlaidy "Ult aqparat" Joǵarǵy palatanyń baspasóz qyzmetine silteme jasap.
Qujattyń basty maqsaty – memlekettik satyp júiesin jetildirý, satyp alý rásiminiń tiimdiligi men ashyqtyǵyn arttyrý jáne sybailas jemqorlyq táýekelderin barynsha azaitý.
«Qarjy ministrligi Elektrondy qarjy ortalyǵynyń derekterine sáikes, 2020 jyly jasalǵan memlekettik satyp alý sharttarynyń kólemi 5,9 trln. teńgeni quraǵan. Onyń ishinde 2,4 trln. teńgeden astam somaǵa teń sharttar tikelei shart jasasý jolymen bir kózden alý tásilimen jasalǵan. Bul kórsetkish memlekettik satyp alýlardyń jalpy kóleminiń 40 paiyzdan astamyn nemese JIÓ-niń 3,6 paiyzyn quraidy», – dedi senator Edil Mamytbekov.
Zań jobasyndaǵy jańashyldyqtardyń biri – bir kózden alý tásilimen memlekettik satyp alýdy júzege asyrýǵa qajetti negizdemeler sanyn qysqartý. Osyǵan orai áleýetti ónim berýshiler memlekettik satyp alýdy taýarlar men olardyń baǵalary týraly aqparatty ornalastyratyn Memlekettik satyp alý veb-portaly integratsiialaǵan jańa aqparattyq júie – elektrondyq dúken arqyly júrgizý usynylyp otyr. Mundai satyp alýlar jalpy quny AEK-tiń 4000 eselengen mólsherinen aspaityn birtekti taýarlarǵa júrgiziledi.
Senatorlar zań jobasyn jan-jaqty talqylaǵan soń, atalǵan qujatty ekinshi oqylymda qaraý týraly sheshim qabyldady.
Sonymen qatar Senat otyrysynda birqatar depýtattyq saýaldar joldandy.
Olga Býlavkina jaiylymdyq jerlerdiń tapshylyǵyna bailanysty aýyl turǵyndary betpe-bet kelip otyrǵan máselelerge nazar aýdarsa, Dúisenǵazy Mýsin kóterme-bólshek saýda ortalyqtaryn salý jaiyn sóz etti.
Ǵumar Dúisembaev Atyraý-Oral jáne Muqyr-Qulsary avtojoldaryn qaita qalpyna keltirý kerektigin aitty.
Óz kezeginde Rysqali Ábdikerov qala úlgisindegi aýyldardaǵy turǵyndardyń máselelerine toqtalsa, Murat Baqtiiaruly Respýblikalyq terminologiialyq komissiia jumysyn jaqsartýdyń mańyzdy ekenin atap ótti. Al Nurtóre Júsip jýrnalisterdiń mártebesin zańmen bekitý qajettigin tilge tiek etti.
