Parlament Senaty Agrarlyq máseleler, tabiǵatty paidalaný jáne aýyldyq aýmaqtardy damytý komiteti elimizdiń Ulttyq ekonomika, aýyl sharýashylyǵy, indýstriia jáne infraqurylymdyq damý ministrlikteriniń basshylarymen kezdesip, «Aýyl-el besigi» arnaiy jobasyn júzege asyrý barysyn talqylady, dep habarlaidy "Ult aqparat" joǵary palatanyń baspasóz qyzmetine silteme jasap.
«Kóptegen aýyldardyń, ásirese shekaradaǵy aýyldyq jerlerdiń «Aýyl-el besigi» jobasyna enbegeni bizdi tolǵandyryp otyr. Ol jerde de bizdiń azamattarymyz turady, olar da mektepter men aýrýhanalarǵa muqtaj», - dedi komitet tóraǵasy Áli Bektaev.
Ulttyq ekonomika ministriniń orynbasary Ermek Alpysovtyń aitýynsha, 2027 jylǵa deiin jobany júzege asyrýǵa 900 mlrd teńge bólinedi. Onyń 70 paiyzy respýblikalyq biýdjetten, qalǵan 30 paiyzy jergilikti biýdjetten bolady. Ákimdiktermen birlese otyryp, jyl sońyna deiin aýyldyq aýmaqtar men eldi mekenderdiń tizimi jańartylady.
«Jospar boiynsha 2027 jylǵa deiin «Aýyl-el besigi» jobasyn júzege asyrý qorytyndysy boiynsha 7 million aýyl turǵynynyń ál-aýqaty jaqsaryp, aýyz sýmen, damyǵan infraqurylymmen qamtamasyz etiledi», - dep sendirdi E. Alpysov.
Agrarlyq máseleler, tabiǵatty paidalaný jáne aýyldyq aýmaqtardy damytý komitetiniń tóraǵasy Áli Bektaev óz kezeginde ministrlik ókilderine eldi mekenderge baryp, bólingen qarajattyń igerilýin tekserý jóninde keńes berdi. Senator sondai-aq komitet baǵdarlamanyń oryndalýyna monitoring júrgizetinin atap ótti.
