Senat tóraǵasynyń orynbasary Asqar Shákirov bastaǵan bir top senatorlar joldaǵan depýtattyq saýalda Aral óńiriniń ekologiialyq máseleleri kóterildi. Senattyń jalpy otyrysynda bul máselege orai Premer-Ministr Álihan Smaiylovtyń atyna saýal joldandy, dep habarlaidy QazAqparat.
«Aral teńizi basseininde turaqty turatyn adamdardyń aǵzasynda ómirlik mańyzy bar dene músheleriniń fýnktsionaldyq jai-kúiinde ózgerister anyqtalyp, tipti, patologiialyq aýrýlardyń damýyna deiingi ózgeriske ushyrap jatyr. Osylaisha, Araldyń qurǵaýy planetarlyq aýqymdaǵy ekologiialyq qasiret bolyp otyr. Ony barlyq elderdiń, halyqaralyq uiymdardyń kúsh-jigerin biriktirý arqyly ǵana toqtatýǵa bolady. Eń aldymen, osy ekologiialyq daǵdarysty sheshýge halyqaralyq qorlar men ǵylymi ortalyqtardy tartý qajet. Sońǵy ýaqytta olardyń aimaqtaǵy belsendiligi aitarlyqtai tómendep otyr», - dedi senator Aqylbek Kúrishbaev depýtattyq saýaldy oqi otyryp.
Senatorlar máseleni sheshý úshin kelesi sheshimderdi usyndy: Halyqaralyq Araldy qutqarý qorynyń jumysyn jandandyrý, Ortalyq Aziia elderimen sý-energetikalyq konsortsiým qurý jáne qurǵap qalǵan teńizdiń túbine jasyl jelekterdi belsendirek otyrǵyzý.
«Aral teńiziniń qazaqstandyq bóligindegi tabiǵi ekpelerdi qosa alǵanda, ormannyń jalpy aýdany 337 myń gektardy qurady. Sonymen qatar, bizdiń ózbek áriptesterimiz shamamen 1,6 mln ga alqapqa sekseýil ekpelerin otyrǵyzdy. Munymen qosa, olar júieli túrde aǵash daqyldarynyń shóldi jaǵdailaryna beiimdelgen túrlerin keńeitýmen ainalysýda. Osyǵan bailanysty bizge aǵash otyrǵyzý jumystarynyń qarqynyn jedeldetip qana qoimai, fitomeliorativtik tehnologiialardy da jetildirý kerek», - dep atap ótti Kúrishbaev.
Depýtattardyń aitýynsha, olar qazirdiń ózinde óz ókilettikteri aiasynda bul baǵytta belsendi jumys istep jatyr. Senatorlar taiaýda ǵana Soltústik Aral sýyn ustap turǵan Kókaral bógetin jóndeý qajettiligi týraly Úkimetke saýal joldaǵanyn eske saldy. Parlamentaralyq diplomatiiany odan ári damytý aiasynda olar dúniejúzilik qoǵamdastyqtyń nazaryn Aral problemasyna aýdarý maqsatynda túrli halyqaralyq platformalarda osy máselelerdi kóterýdi kózdep otyr.
