Senator Ǵumar Dúisembaev Úkimet basshysy Álihan Smaiylovtyń atyna joldaǵan depýtattyq saýalynda Atyraý jáne Mańǵystaý oblystaryndaǵy aýyz sý tapshylyǵyna qatysty problemalardy atap ótti, dep habarlaidy QazAqparat.
Senator Teńiz jáne Qashaǵan ken oryndaryn igerýdi belsendi túrde ulǵaitý, sondai-aq Atyraý munai-himiia parkin damytý jáne gaz óńdeý zaýytyn salý taiaý bolashaqta sý tapshylyǵynyń artýyna alyp keledi dep sanaidy. Ol ásirese Atyraý oblysynyń Isatai, Jyloi aýdandary men Qulsary qalasynyń turǵyndaryna qatysty bolýy yqtimal, mundaǵy turǵyndar qazirgi kezdiń ózinde jaz mezgilinde sýdy saǵat boiynsha alady.
Bul máseleni sheshýge «Kókjide» tushy sý erekshe ken orny kómektese alar edi. Ol Aqtóbe jáne Atyraý oblystarynyń shekarasynda Muǵaljar aýdanynda ornalasqan batys óńirdegi eń iri tushy sý kózi. Alaida, senator jer qoinaýyn paidalanýshylar osy ken orny aýmaǵy men dál janynan uńǵyma qazyp, izdestirý jumystaryn júrgizip, jer asty sýynyń lastanýyna ákelýi múmkin dep alańdap otyr. Al taza sý kózi lastanǵan jaǵdaida týyndaityn shyǵyn jer qoinaýyn paidalanýshylardan túsetin kiristermen salystyrýǵa kelmeidi.
«Osy gidrogeologiialyq obektidegi jerasty sýynyń jai-kúiine turaqty monitoring júrgizý úshin biryńǵai operatordy aiqyndaý máselesin qaraýdy suraimyz. Kókjide mekeninde ekologiialyq jaǵdaidyń nasharlaýyna jáne jer asty sýynyń lastanýyna jol bermeý úshin qoldanystaǵy munai óndirýge arnalǵan kelisimsharttardy zerdeleý kerek. Qajet bolǵan jaǵdaida, munai kompaniialaryna odan ári izdestirý jumystaryn júrgizýge tyiym salý jáne kelisimsharttardy uzartpaý kerek», - dep atap ótti senator.
