Parlament Senatynyń jalpy otyrysynda depýtat Súiindik Aldashev teńizdegi jedel-qutqarý qyzmetin qurýdy usyndy. Osy oraida Premer-Ministrdiń atyna osyndai depýtattyq saýal joldady, dep habarlaidy "Ult aqparat".
Onyń aitýynsha, ótken jyly Kaspii teńiziniń qazaqstandyq sektorynda 15 mln tonna munai óndirildi, onyń 2,2 mln tonnasy Aqtaý porty arqyly tasymaldandy. Odan basqa, 2020 jyly kemeler Aqtaý jáne Quryq teńiz porttaryna 1 283 ret kirgen, al 2025 jylǵa deiin bul kórsetkish 2 ese artady degen jospar bar.
Senatordyń pikirinshe, munyń bári Kaspii teńiziniń lastaný qaýpin arttyrady jáne qazir belsendi sharalar qabyldaý asa mańyzdy. Osyndai sharalardyń biri teńizdegi jedel-qutqarý qyzmetin qurý bolýǵa tiis.
«Kaspii teńiziniń lastanýynyń negizgi qateri óndirý jáne tasymaldaý kezinde munai jáne munai ónimderiniń tógilýi bolyp sanalady. Sondyqtan teńiz betiniń lastaný aimaǵynyń ulǵaiýyna jol bermeý úshin munai daqtaryn oqshaýlaý jáne joiý úlken uiymdastyrýshylyq, tehnikalyq, tehnologiialyq kúsh jigerdi qajet etedi. Ókinishke qarai, búgingi tańda Qazaqstan Respýblikasynda belgilengen tártippen attestattalǵan, arnaiy tehnikamen, materialdarmen jaraqtalǵan, bilikti jáne tájiribeli mamandardyń, qutqarýshylardyń jetkilikti sany bar bólimshe joq», - dedi Súiindik Aldashev.
Senatordyń aitýynsha, mundai qyzmetti qurýdyń taǵy bir sebebi - sýdaǵy tehnogendik qaýipsizdikti qamtamasyz etý boiynsha álemdik tájiribede qoldanylatyn ádister qurǵaqtaǵy is-sharalardan túbegeili erekshelenedi. Al eldiń Tótenshe jaǵdailar ministrligi júiesindegi kúshter men quraldar, sonyń ishinde jedel-qutqarý jasaqtary ondai mindetterdi oryndai almaidy.
Senator sondai-aq mundai arnaiy teńiz jedel-qutqarý qyzmetteri Kaspii mańyndaǵy basqa elderde, atap aitqanda Ázerbaijanda, Reseide jáne Túrikmenstanda qurylyp, jumys istep jatqanyn aitty.
