Senator Edil Mamytbekov «Samuryq-Qazyna» qory týraly zańdy qaita qaraý nemese tipti ony el ekonomikasynyń damýyn tejeýshi retinde joiý qajet dep sanaidy, dep habarlaidy QazAqparat.
Senattyń jalpy otyrysynda depýtat óz saýalynda 600-ge jýyq uiymdy qamtityn kvazimemlekettik sektordy, ásirese «Samuryq-Qazyna» ulttyq ál-aýqat qoryn túbegeili reformalaý jónindegi Prezident alǵa qoiǵan mindetterdi iske asyrýdyń mańyzyn atap ótti.
«Sońǵy ýaqytta «Samuryq-Qazyna» qoryna qatysty shaǵymdar az emes. Buǵan sebepter de jetkilikti - Holdingtiń quramyna kóptegen qýatty institýttar kiredi, olardan qaitarymyn kútkenimizge kóp boldy. Al ol joq! Qur áńgime, túsiniksiz josparlar, jobalar, baǵdarlamalar ǵana bar. Qordyń basty kemshiligi - onyń kóp milliardtyq memlekettik qarajatty bólýdegi jáne jumsaýdaǵy shemalarynyń kómeskiligi men shatasýy bolyp otyr», - dep atap ótti senator Úkimet basshysy Álihan Smaiylovtyń atyna joldaǵan saýalynda.
Senator sondai-aq Úkimet aldyna qordy jańǵyrtý jónindegi qabyldanatyn úlginiń tiimdiligine qatysty birqatar máseleler qoidy.
«Básekelestik ortaǵa qandai aktivter beriledi? Ulttyq ekonomikalyq qaýipsizdik múddeleri qalai eskeriletin bolady? Barlyǵyn básekelestik ortaǵa berý kerek pe? Qordy jańǵyrtýdyń qabyldanatyn úlgisiniń tiimdiligi qandai, memlekettiń kásipkerlik qyzmetke qatysýyn qysqartý mólsheri qandai? Bul rette biz strategiialyq mańyzdy obektiler memlekettiń baqylaýynda qalýy tiis jáne jekeshelendirýge jatpaýy kerek dep esepteimiz», - dedi Edil Mamytbekov.
«Úkimet joǵaryda atalǵan problemalar men mindetter boiynsha óziniń memlekettik ustanymyn qabyldap, ázirleýi qajet dep sanaimyz», - dedi senator.
