Senat depýtaty Sársenbai Eńsegenov Qazaqstandaǵy benzin qunyn Reseidegi baǵaǵa jetkizý saldary áleýmettik máseleni týdyrýy múmkin ekenin málim etti, dep habarlaidy QazAqparat.
«Aldaǵy ýaqytta bizdiń munai óńdeýshi kompaniialar tabys tabý maqsatynda benzindi shetelge shyǵarýy múmkindigi bar, sebebi otynnyń naryqtyq baǵasy joǵary. Osy turǵydan qarastyrsaq, bizdiń ishki naryǵymyzdy janar-jaǵarmaimen qamtamasyz etýdiń tiimdi tetikterin eskerý kerek. Ekinshiden, bul munai óńdeý kompaniialarynyń otyndy shetelge satý arqyly túsetin tabysyn elimizdegi ishki naryqtan túsetin tabysymen bailanystyrmaý qajet. Óitkeni bul naryqtar ózara bailanysta bolsa, onda elimizde otyn baǵasy qymbattaýy yqtimal», - dedi depýtat Parlament Senaty Ekonomikalyq saiasat, innovatsiialyq damý jáne kásipkerlik komitetiniń keńeitilgen otyrysynda.
Sonymen qatar, senator Qazaqstanda benzin qunyn Reseidegi baǵaǵa jetkizýge bolmaitynyn atap ótti.
«Resei men Qazaqstandaǵy janar-jaǵarmaidyń baǵasyn salystyrý múldem qate bolar edi. Sebebi, RF-tegi eńbekaqy mólsheri bizge qaraǵanda joǵary, sondai-aq zeinetaqy deńgeii de joǵarylaý. Osy oraida Reseidegi benzin baǵasyna elikteý nemese sol baǵaǵa jetkizýge talpyný áleýmettik salada másele týdyrýy múmkin», - dedi Sársenbai Eńsegenov.
Budan buryn habarlanǵandai, QR Energetika vitse-ministri Bolat Aqsholaqov RF-pen salystyrǵanda elimizde benzin men dizel otynynyń baǵasy arzandaý ekenin aitqan bolatyn.
Aita keteiik, búgin komitettiń keńeitilgen otyrysynda «2010 jylǵy 9 jeltoqsandaǵy QR Ykimeti men RF Úkimeti arasyndaǵy Qazaqstan Respýblikasyna munai jáne munai ónimderin jetkizý salasyndaǵy saýda-ekonomikalyq yntymaqtastyq týraly kelisimge ózgerister engizý týraly hattamany ratifikatsiialaý týraly» zań jobasy qaraldy.
