Foto:uralskweek.kz
Senator Áli Bektaev jańa jyldyq merekeni Naýryzǵa aýystyryp, jańasha toilaýdy usyndy, - dep habarlaidy Sputnik Qazaqstan.
Onyń aitýynsha, búginde jańa jyldyq sharalarda ysyrapshyldyq pen daraqylyq basym bolyp barady. Biýdjet qarjysyna júzdegen muz qalashyqtary salynyp, otshashýlar atylady. Al halyq saýda ortalyqtaryn aralap ketedi. Baǵa da kúrt sharyqtaidy.
"Táýelsiz Qazaqstanda jańa jyldy atap ótýdiń erekshe ideologiialyq-áleýmettik negizin qalyptastyratyn ýaqyt keldi. Elimizde úsh myń jyldyq tarihy bar Naýryz meiramy tereń dástúrge enýi qajet", - dedi Bektaev Senattyń búgingi otyrysynda.
Osy oraida depýtat Naýryz merekesin dáripteitin jalpyulttyq tujyrymdamany qabyldaýdy usyndy.
"Naýryz kól-kósir dastarqan jasap, júzdegen kiiz úi tigip, ysyrapshyldyqqa jol beretin meiram emes, ár otbasyǵa, ár aýylǵa, ár óńirge rýhani nár beretin jańashyl merekege ainalýy kerek. Ár jyldyń ekonomikalyq-statistikalyq qorytyndysy aldaǵy aqpan-naýryz ailarynda shyǵarylatynyn eskere otyryp, Naýryz merekesi qarsańynda ótken jyldy qorytyndylap, eńbek ujymdary men eńbek ozattaryn marapattaý dástúrge ainalýy tiis. Tipti, ákimderdiń jyl saiyn ótkizetin shyrshalaryn naýryz aiynda Qydyr atanyń qatysýymen basqasha ótkizý de mańyzdy", - dep atap kórsetti Bektaev.
Sondai-aq Naýryz meiramynyń tárbielik mánin zerttep qana qoimai, sony qalyń buqaraǵa jetkizetin ǵylymi ortalyq kerek dep sanaidy senator.
