Parlament Senatynda 2020-2022 jyldarǵa arnalǵan respýblikalyq biýdjet jobasynyń tanystyrylymynda senator Dinar Nóketaeva elimizde qazaq mektepteriniń sanyn kóbeitý qajettigin másele etip kóterdi, dep habarlaidy "Ult aqparat".
«Almaty qalasynyń quramyna Almaty oblysynan eki úlken jańa aýdan qosyldy. Osy aýdandardyń máselesi jetip artylady. Ony da eskerý kerek. Bul eki aýdanda, qudaiǵa shúkir, halyqtyń sany artyp keledi. Osyǵan bailanysty mektepter salý máselesi bar. Ásirese qazaq tilindegi mektepterdi jyldan jylǵa kóbeitý kerek dep esepteimiz. Óitkeni, bir mektepti alatyn bolsaq, byltyrdyń ózinde qazaq tilinde oqityn 13 synyp ashylǵan. Tipti bir synyptyń ózinde 40-42 baladan otyrady. Sondyqtan, bolashaqta osy máseleni de eskerý kerek», - dedi Dinar Nóketaeva.
Sonymen birge, senator Almaty qalasynyń shetindegi aýdandardyń aýyz sý máselesin de tilge tiek etti.
«Sý júielerin retke keltirý, kóliktik infraqurylym, ishki joldar, mektepter men aýrýhanalardy seismikalyq sipatta kúsheitý máselelerin der kezinde sheshken abzal. Óitkeni, Almaty qalasy seismikalyq aýmaqta ekenin bilesizder. Nelikten Almatydan jyldan jylǵa qarajatty alyp qoiý jaǵdaiy ulǵaiyp keledi? Osy másele boiynsha Úkimet basshysy Asqar Maminge de suraq joldadyq. Sondyqtan, Almaty qalasyna qarajatty biylǵy biýdjetten taǵy qarastyrý kerek dep oilaimyn», - dedi ol.
Aita ketsek, búgin Qarjy ministriniń birinshi orynbasary Berik Sholpanqulov Parlament Senatynyń depýtattaryna 2020-2022 jyldarǵa arnalǵan respýblikalyq biýdjet jobasyn tanystyryp, bilim jáne ǵylym júiesin damytýǵa 2020-2022 jyldary 3,7 trln teńge bólingeli otyrǵanyn málim etken bolatyn.
