Foto:gov.kz
Senat depýtaty Gúlmira Kárimova qaitys boldy. Qaiǵyly habardy QR Parlamenti Senatynyń baspasóz qyzmeti rastady, - dep habarlaidy "Ult aqparat".
"Búgin túnde jańadan sailanǵan senator Gúlmira Kárimova 45 jasynda kenetten qaitys bolǵanyn qaiǵyra habarlaimyz. Oǵan aldyn ala «anafilaksiialyq shok» degen diagnoz qoiylyp otyr. Qazaqstan Respýblikasy Parlamenti Senatynyń depýtattary men Apparaty Gúlmira Rainbekqyzynyń týystary men jaqyndaryna kóńil aitady", - delingen habarlamada.
Gúlmira Raiynbekqyzy Kárimova 1977 jyly 13 tamyzda Petropavl qalasynda dúniege kelgen.
1998 jyly Soltústik Qazaqstan memlekettik ýniversitetin "Bastaýysh synyp muǵalimi" mamandyǵy boiynsha, 2008 jyly Kókshetaý ýniversitetin "Qarjy" mamandyǵy boiynsha bitirgen. Sondai-aq ol 2016 jyly "Pedagogikalyq bilim berý" baǵyty boiynsha Omby memlekettik pedagogikalyq ýniversitetiniń magistratýrasyn bitirdi.
Eńbek jolyn 1998 jyly Petropavl qalalyq klassikalyq gimnaziiasynyń bastaýysh synyp muǵalimi bolyp bastaǵan.
2006 jyldan bastap direktordyń ǵylymi-ádistemelik jumys jónindegi orynbasary qyzmetin atqarǵan.
2010 jyldan bastap №17 ulttyq jańǵyrý orta mektep-kesheniniń direktory bolyp jumys istedi.
2013 jyldan bastap Petropavl qalasynyń "Bilim bólimi" memlekettik mekemesiniń basshysy bolǵan.
2017 jyly Soltústik Qazaqstan oblysy ákimdiginiń Bilim basqarmasynyń basshysy bolyp taǵaiyndalǵan.
2021 jyldyń qyrkúieginen - Bilim jáne ǵylym ministrliginiń Mektepke deiingi jáne orta bilim komitetiniń tóraǵasy.
