Biryńǵai memlekettik saiasat júrgizetin derbes sý sharýashylyǵy vedomstvosyn qurý kerek. Bul týraly Senattyń jalpy otyrysynda depýtat Aqylbek Kúrishbaev aitty, dep habarlaidy QazAqparat.
«Eń bastysy, qazir sý tapshylyǵynyń ósýi jaǵdaiynda kóptegen elder sý resýrstaryn basqarýdaǵy saiasatyn ózgertip, osy saladaǵy memlekettik baqylaýdy kúsheitýde. Mundai elderde sý resýrstaryn basqarýdyń biryńǵai memlekettik vertikaly qurylǵan, sý sharýashylyǵynyń mamandandyrylǵan ministrligi (agenttigi) uiymdastyrylǵan. Al bizde sý máselesimen 6 ministrlik, jergilikti atqarýshy organdar jáne «Samuryq-Qazyna» aktsionerlik qoǵamy ainalysady. Jalpy, biz memlekettik organdardyń sanyn kóbeitýge qarsymyz, biraq sý sharýashylyǵyn basqarýda únemdeýge bolmaidy. Salanyń strategiialyq mańyzdylyǵyn eskere otyryp, Qazaqstanda sý resýrstaryn integratsiialanǵan basqarý júiesin qamtý úshin biryńǵai memlekettik saiasat júrgizetin derbes sý sharýashylyǵy vedomstvosyn qurýdy usynamyz», - dedi dedi A. Kúrishbaev Úkimet basshysynyń atyna joldaǵan saýalynda.
Dúniejúzilik banktiń boljamy boiynsha, Qazaqstandaǵy sý resýrstarynyń kólemi 2030 jylǵa qarai jylyna 90 km³-den 76 km³-ge deiin tómendeidi. Bul eldegi sý tapshylyǵy 8 jyldan keiin jylyna shamamen 12-15 km³, iaǵni 15%-dy quraitynyn bildiredi.
«Halyqaralyq sarapshylar atap ótkendei, Qazaqstandaǵy basty másele sý resýrstaryn josparlaý men baqylaý júiesiniń jetilmegendigi bolyp otyr. Bizdegi búgingi jaǵdaidy sý resýrstaryn basqarý emes, sýǵa degen suranysty basqarý dep ataýǵa bolady.
Birinshiden, áli kúnge deiin biz respýblikadaǵy sý resýrstarynyń qorlary týraly naqty aqparatty bilmeimiz. Memlekettik sý kadastryn qazirgidei jeke uiymdar emes, «Qazgidromet» kásiporny júrgizýi tiis. Ol úshin sý qorynyń monitoringin tsifrlyq formatqa jáne qashyqtan zondtaý tehnologiiasyna aýystyrý qajet», -
Onyń paiymynsha, qazirgi zamanǵy talaptardy eskere otyryp, Qazaqstannyń sý resýrstaryn keshendi paidalaný men qorǵaý shemasyn jańartý qajet. «Árbir sý basseini úshin sýdyń naqty ózindik qunyn anyqtaý qajet. Onsyz sý resýrstaryn únemdi paidalaný múmkin emes.
«Sýarmaly egistiktiń tek 16%-yna ǵana tamshylatyp sýarý tehnologiialary men jańbyrlatqysh qondyrǵylardy paidalanylady. Basqasha aitqanda, sýarmaly sýdyń kóp bóligi qumǵa ketedi deýge bolady. Sondyqtan sýarmaly eginshilikti memlekettik qoldaý saiasatyn ózgertý qajet. Ony tek sý únemdeý tehnologiialaryn qoldanatyndar ǵana alýy kerek», - dedi senator.
Onyń aitýynsha, halyqty sapaly aýyz sýmen qamtamasyz etýdegi basty máseleniń biri – sý obektilerinde mamandyrylǵan eksplýatatsiialyq uiymdardyń joqtyǵynda. Densaýlyq saqtaý ministrliginiń málimetteri boiynsha, búginde eldegi 235 ortalyqtandyrylǵan sýmen jáne 483 ortalyqtandyrylmaǵan sýmen jabdyqtaý obektileri iesiz qalǵan.
