Senator Andrei Lýkin óziniń depýtattyq saýalynda Densaýlyq saqtaý ministrligi jáne oǵan qarasty kompaniialardyń qyzmetindegi zań talaptaryn buzý faktilerin atap ótti, dep habarlaidy "Ult aqparat" Senattyń baspasóz qyzmetine silteme jasap.
Depýtattyń aitýynsha, Densaýlyq saqtaý ministrligi dári-dármek jáne meditsinalyq ónimderge arnalǵan shyǵyndardy josparlaǵanda mańyzdy kórsetkishter joq nemese joǵary belgilengen biýdjettik ótinim negizinde jasaǵan. Jumystaǵy mundai tásil 66 milliardqa jýyq biýdjet teńgesiniń tiimsiz jumsalýyna alyp keldi.
«2020 jyly 39 nozologiiaǵa shamamen 66 mlrd teńge tiimsiz jumsaldy. Onda 6 nozologiia boiynsha 26 mlrd teńge kóleminde tolyq qarjylandyrylmaý aiasynda zań talaptarynyń osylai buzylýyna jol berilgen. Keiinnen 2019-2020 jyldary «SK-Farmatsiia» JShS saqtaý qoimalarynda 159 mln teńgeniń preparattarynyń jaramdylyq merzimi ótip ketkendikten joiylýǵa jiberýge jatqyzyldy. Sonymen qatar, ministrlik Ulttyq ortalyqtyń esepteýleri negizinde, sondai-aq Kodekstiń 76-babyna qaramastan dári-dármektiń shekti baǵasyn kóterip jibergen. Nátijesinde dári-dármek óz qunynan 1,5 mlrd teńgege qymbatqa satyp alyndy», - dedi Andrei Lýkin.
Ol sonymen qatar osy ýaqytqa deiin Qazaqstanda Memlekettik farmakopeia bekitilmegenin habarlady. Iaǵni, dárilerdiń sapasy men qaýipsizdigine qoiylatyn talaptardy belgileitin qujat bizde áli joq.
Senator osyǵan bailanysty dárilik zattardy jetkizýshiler arasyndaǵy básekelestikke qarsy kelisimderdi ázirleýge, patsientter týraly málimetterge mańyz bere otyryp anyqtyǵyn qamtamasyz etýge qatysty suraqtarǵa jaýap berýdi surady. Andrei Lýkin sonymen qatar ministrliktiń biýdjettik ótinimin daiyndaý kezinde barlyq meditsinalyq uiymdarǵa arnalǵan dárilik zattar men meditsinalyq buiymdarǵa qajettilikti aiqyndaýdyń biryńǵai erejesin ázirleýdiń mańyzdylyǵyn atap ótti.
