Parlament Senatynyń depýtaty Muhtar Jumaǵaziev bilet tapshylyǵyn ýshyqtyryp otyrǵandarǵa tiisti shara qoldanýdy surady. Osy oraida ol QR Úkimet basshysy Asqar Maminniń atyna depýtattyq saýal joldady, dep habarlaidy "Ult aqparat".
«Aqtóbe men elordany bailanystyratyn «Nur-Sultan – Aqtóbe», «Aqtóbe – Nur-Sultan» baǵyty boiynsha tikelei qatynaityn poiyz baǵdary 2018 jyldan beri alynyp tastalǵan. Osynyń saldarynan joǵaryda qabyldanǵan sheshim elordaǵa qatynaityn azamattardyń, onyń ishinde stýdentterdiń de narazylyǵyn týǵyzyp otyr. Olardy túsinýge bolady, sebepteri joq emes. Endi Aqtóbe qalasyna jetý úshin yńǵaisyz ýaqytpen júretin «Nur-Sultan – Oral» poiyzyna otyrýy tiis. Al osy baǵdar boiynsha bilet alýǵa kem degende 1,5 millionǵa jýyq eki oblystyń turǵyndary básekege túsedi. Bul rette bilettiń tapshy bolatyny kúmán týǵyzbaidy. Jaz shyǵysymen jáne merekeler qarsańynda biletter joq bolyp ketedi. Baǵyńyz janyp, taba qalǵan jaǵdaida baǵasynan shashyńyz tik turady», - dedi senator.
Osy oraida Muhtar Jumaǵaziev jeke kassalarmen sybailasqan deldaldardyń kinásinen jurtshylyq bilet tappai vokzalda sandalyp nemese temirjol kassalaryn ańdýmen álek bolatynyn atap ótti.
«Quny 6-12 myń turatyn bilet eselenip, 58 myń teńgege satylyp jatqany buqaralyq aqparat quraldarynda jariialanǵan bolatyn. Bul másele alǵash ret kóterilip turǵan joq. Óńirdegi halyqtyń janaiqaiyn jetkizý maqsatynda oblys basshylyǵy «Qazaqstan temir joly» ulttyq kompaniiasynyń basqarma tóraǵasyna bir emes, eki ret hat joldaǵan jáne Parlament qabyrǵasynda da bul másele talqylanǵan. Alaida bul kúrdeli suraqtyń oń sheshimi áli tabylǵan joq. Temirjol tasymalyndaǵy turmystyq jemqorlyqtyń aldyn alý úshin qabyldanǵan jol kartasy óz jumysyn qashan bastaidy, naqty nátijesin qashan kóremiz? Bilet tapshylyǵynyń ýshyǵýyna óz yqpalyn tigizip júrgenderge qatań shara qashan qoldanylady?», - delingen depýtattyq saýalda.
Onyń paiymynsha, «Aqtóbe - Nur-Sultan» baǵytymen jolaýshylar tasymalyn qaita qalpyna keltirý - oblystyń odan ári damý perspektivasyna jańa serpin berip, óńir turǵyndarynyń ótinish-tilekterin qanaǵattandyrar edi.
