Búgin Senattyń jalpy otyrysynda depýtat Murat Baqtiiaruly «Baiqońyr» ǵarysh ailaǵynan ushatyn zymyrandardy kóktem ailarynda ushyrmaýdy surady, dep habarlaidy QazAqparat.
Aita keteiik, búgin jalpy otyrysta «2004 jylǵy 22 jeltoqsandaǵy QR Úkimeti men RF Úkimeti arasyndaǵy «Baiqońyr» ǵarysh ailaǵynda «Báiterek» ǵarysh zymyran keshenin qurý týraly kelisimge ózgerister men tolyqtyrýlar engizý týraly hattamany ratifikatsiialaý týraly» Zańy qabyldandy.
«Búgingi talqyǵa túsip otyrǵan Zań jobasy bizdiń komitette de jan-jaqty qyzý talqylandy. Bul hattama jobasynyń erejeleri qabyldanǵan jaǵdaida Baiqońyr ǵarysh ailaǵynda «Báiterek» ǵarysh zymyrany keshenin birlesip paidalaný máseleleri boiynsha Qazaqstan – Resei yntymaqtastyǵy barysynda týyndaityn quqyqtyq qatynastardy retteitin bolady. Ásirese, kópten beri sheshimin tappai kele jatqan Resei tarapynyń menshigindegi jáne Baiqońyr kesheniniń obektilerinde ornalasqan múlikti qabyldaý-tapsyrý úshin uiymdyq-quqyqtyq máseleler sheshimin tabady dep oilaimyz. Báiterek ǵarysh zymyran keshenin qurý orbitalyq spýtniktik júielerdi jańartý jáne qalyptastyrý jónindegi múmkindikterdi keńeitýge múmkindik beretin aýqymdy Qazaqstan – Resei jobasy dep aitýǵa bolady. Sondyqtan da Zań jobasyn qoldaimyn», - dep toqtaldy Baqtiiaruly.
Sonymen birge senator 80 myńǵa jýyq halyq turatyn Baiqońyr qalasynyń turǵyndary jáne sailaýshylarymen kezdesý barysynda olardyń talap-ótinishteri boiynsha uzaq jyldar boiy áli de bolsa sheshimin tappai kele jatqan máselelerge nazar aýdardy.
«Birinshiden, árbir zymyran usha salysymen keminde tórt-bes kún boiy aýa raiy buzylyp, qatty jel turady. Ol jel ońtústúgi Jańaqorǵan, soltústigi Araldan asyp Yrǵyzǵa deiin barady. Kóktem ailarynda ylǵaldy bolǵan jerlerde jaqsy shyqqan shópti jáne jerdi osy úzdiksiz soqqan jel keptirip jiberedi. Bul mal men egin sharýashylyǵyna zardabyn tigizip jatqan qalypty qubylysqa ainaldy. Sondyqtan da bizdiń sailaýshylarymyz múmkindik bolǵansha Baiqońyr ǵarysh ailaǵynan ushatyn zymyrandardy kóktem ailarynda ushyrmaýdy suraidy», - dedi depýtat.
M. Baqtiiaruly Baiqońyr qalasy men ǵarysh kesheni Reseige uzaq jyldarǵa jalǵa berilgenin aita kele, osy úshin jylyna Qazaqstan biýdjetine 115 mln dollar kóleminde qarjy túsetinine toqtaldy.
Senatordyń aitýynsha, sońǵy 15-20 jyldyń ishinde osy aimaqtaǵy turǵyndar arasynda qan-tamyrlary aýrýlary kóbeigen. Buǵan kezinde asa ýly otyn geptilmen ushatyn Proton zymyrandarynda bolǵan apattardyń úlken áseri boldy.
«Jalǵa berýden túsetin qarjynyń bir bóligi jergilikti turǵyndardyń emdeý-saýyqtyrý oryndarynda densaýlyǵyn jóndeýge berilip otyrý kerek dep esepteimiz», - dedi Murat Baqtiiaruly.
