Traktor parkiniń 80 paiyzynyń, kombain parkiniń 76 paiyzynyń qoldaný merzimi 10 jyldan asyp ketti. Bul týraly Senatta aýyl sharýashylyǵy tehnikasy taqyrybyna arnalǵan dóńgelek ústel otyrysynda depýtat Muhtar Jumaǵaziev aitty, dep habarlaidy QazAqparat.
«Qazaqstanda óndirýshilerdiń kúsh-jigeri men shyǵarylymynyń ósýine qaramastan, aýyl sharýashylyǵy tehnikasyn óndirý salasyn damytý máselesi jan-jaqty zertteýdi talap etedi. Atap aitqanda, aýyl sharýashylyǵy tehnikasyn damytý barysynda jii kezdesetin ózekti máseleler: qoldanystaǵy tehnikanyń eskirýi, kádege jaratý, investitsiialyq jáne syiaqy stavkasyn sýbsidiialaý, tehnikany lizingke berý, el aýmaǵynda tehnika jasap shyǵaratyn mekemelerdiń tapshylyǵy, sondai-aq búginde valiýta naryǵynyń turaqsyzdyǵyna bailanysty importtyq tehnikanyń 1-1,5 esege qymbattaýy», - dedi M. Jumaǵaziev.
Onyń aitýynsha, 2022 jyldyń 1 qańtaryndaǵy jaǵdai boiynsha traktor parkiniń - 80 paiyzy, kombain parkiniń - 76 paiyzynyń qoldaný merzimi 10 jyldan asyp ketken.
Bul óz kezeginde aýyl sharýashylyǵy jumystaryn júrgizý merziminiń sozylýyna ákep soǵady.
«Bul jaǵdai ónimniń azaiýy, qosymsha eńbekaqy tóleý men basqa da shyǵyndarǵa májbúrleidi», - dedi senator.
