Senator Sergei Ershov elimizdiń Premer-Ministri Asqar Maminniń atyna joldaǵan depýtattyq saýalynda ónerkásip qaýipsizdigi salasyndaǵy ózekti máselelerdi jariia etti, dep habarlaidy QazAqparat.
Senator elimizdiń ónerkásip kásiporyndarynda apat týyndaý qaýpiniń deńgeii burynǵysynsha joǵary ekenin aitty. 7 qarashada «ArselorMittal Temirtaý» aktsionerlik qoǵamynyń «Abai» shahtasynda apat bolyp, 6 kenshi qaza tapty, ekeýi zardap shekti.
Depýtat aitqan aqparat boiynsha sońǵy 10 jylda «ArselorMittal Temirtaý» metallýrgiialyq kompaniiasynyń barlyq bólimshelerinde apat sany kóbeiip barady. Osy ýaqyt ishinde kompaniianyń kómir shahtalarynda 23 apat boldy, odan 41 adam zardap shekti, onyń 19-y qaza boldy. Bul 2006 jáne 2008 jyldardaǵy eki iri apatty eseptemegendegi jaǵdai, onda 71 shahter qaza tapqan bolatyn.
Sergei Ershov ónerkásiptegi qaýipsizdiktiń jai-kúiin jaqsartý úshin qazirgi kezde osy kásiporynda da, búkil memleket aýqymynda da úkimettik deńgeide sharalar qabyldaý mańyzdy dep sanaidy.
Senator sondai-aq kompaniiada investitsiialyq mindettemelerdiń oryndalmaýy, qyzmetkerlerdiń tiisti áleýmettik kepildikteriniń bolmaýy, jabdyqtardy jańǵyrtýdyń tolyq qarjylandyrylmaýy, bilikti kadrlardyń ketýi, sondai-aq ziiandy zattar shyǵaryndylaryn azaitý jónindegi mindettemelerdiń oryndalmaýǵa qatysty birqatar ózekti máseleler bar ekenin atap ótti.
«Úkimetti qabyldanǵan mindettemelerdi múltiksiz saqtaýǵa jáne apat pen ólimge dýshar etetin jaraqattaný sanynyń óse túsýine yqpal etetin jaǵdaidy boldyrmaýǵa shaqyra otyryp, ózderiniń jeke otyrysynda salanyń jaǵdaiyn jáne «Arselordyń» jai-kúiin qaraýdy suraimyz. Qaýipti óndiris obektilerinde ónerkásip qaýipsizdigin qamtamasyz etý jónindegi naqty jáne júieli sharalar, sondai-aq qyzmetkerlerdiń áleýmettik ahýaly men óńirdegi ekologiialyq jaǵdaidy jaqsartý jóninde Arselormen investitsiialyq kelisimdi qaita qaraý týraly sharalar usynatyn bolsyn», - dedi Sergei Ershov óz saýalynda.
Depýtat osy máselelerdi qaraý barysynda kásiporyndardyń óndiristik jáne ekonomikalyq basymdyqtarynan azamattardyń qaýipsizdigi negizgi qaǵidatqa ári basymdyqqa ainalýy tiis ekenin atap ótti. Al qaýipti óndiris obektileri qyzmetiniń barlyq salalary men barlyq kezeńderinde ónerkásip qaýipsizdiginiń talaptary eń basty, jalpyǵa birdei jáne bólinbes bólshegi bolyp belgilenýi tiis.
