Parlament Senatynyń jalpy otyrysynda «Qazaqstan Respýblikasynyń keibir zańnamalyq aktilerine mádeniet, dene shynyqtyrý jáne sport máseleleri boiynsha ózgerister men tolyqtyrýlar engizý týraly» Zańy qabyldandy, dep habarlaidy "Ult aqparat".
Zań jobasynyń negizgi baǵyttary: ýákiletti organnyń quzyretin keńeitý, jergilikti atqarýshy organdardyń quzyretin keńeitý, sporttyq infraqurylymynyń qoljetimdiligi, bilim berý salasyndaǵy jańalyqtar.
Mádeniet jáne sport ministri Aqtoty Raiymqulovanyń aitýynsha, ýákiletti organnyń quzyreti ulttyq sport túrleriniń tizbesin bekitý, balalarǵa arnalǵan sport sektsiialary men shyǵarmashylyq úiirmelerge memlekettik sporttyq jáne shyǵarmashylyq tapsyrysty ornalastyrý qaǵidalaryn bekitý, sondai-aq memlekettik sporttyq jáne shyǵarmashylyq tapsyrysty qarjylandyrýdyń jan basyna shaqqandaǵy normativin bekitý boiynsha tiisti fýnktsiialarmen tolyqtyryldy.
«Jergilikti atqarýshy organdardyń quzyreti kelesi qyzmettermen tolyqtyryldy: dárigerlik-dene shynyqtyrý dispanserleriniń sanyn arttyrý, halyqpen jumys isteý úshin dene shynyqtyrý jáne sport nusqaýshylarymen qamtamasyz etý, memlekettik sporttyq ári shyǵarmashylyq tapsyrysty bekitý jáne ornalastyrý, balalar-jasóspirimder dene shynyqtyrý daiarlyǵy klýbtar jelisin keńeitý», - dedi ministr.
Sport infraqurylymynyń qoljetimdiligi mynalardy qarastyrady:
- múgedekter men halyqtyń júrip-turýy shekteýli toptaryn qosa alǵanda, olardyń turǵylyqty jeri boiynsha jáne kópshilik demalatyn oryndarda sport obektileriniń qoljetimdiligin qamtamasyz etý;
- turǵyn úi keshenderin salý kezinde múgedekter men halyqtyń júrip-turýy shekteýli toptarynyń qoljetimdiligin eskere otyryp, sport alańdarymen qamtamasyz etý qajettiligi.
Jalpy otyrys barysynda Senat tóraǵasy Máýlen Áshimbaev bul qujat balalardyń jan-jaqty damýyna yqpal etetin sport jáne shyǵarmashylyq baǵyttaǵy memlekettik tapsyrystardy tiimdi uiymdastyrýǵa múmkindik beretinin atap ótti.
«Budan bylai memleket qarjylandyratyn sporttyq jáne shyǵarmashylyq úiirmeler memlekettik satyp alýdyń qorytyndysyna bailanysty emes, olardyń reitingine, sondai-aq, halyqtyń suranysyna qarai anyqtalady. Osy zańǵa múmkindigi shekteýli jandar úshin turǵylyqty jerde jáne demalys oryndarynda sportpen shuǵyldanýǵa jaǵdai jasaý normalary da engizildi. Soǵan sáikes bul jumys endi jergilikti atqarýshy organdardyń mindeti bolyp esepteledi. Sonymen qatar bul qujatta ulttyq sport túrlerin damytý, olardy jas býynǵa mektep kezinen bastap nasihattaý máselelerine de erekshe nazar aýdarylǵan», – dedi M. Áshimbaev.
