Senat tóraǵasy Máýlen Áshimbaev Ulybritaniia jáne Soltústik Irlandiia Qurama Koroldiginiń Qazaqstan Respýblikasyndaǵy Tótenshe jáne Ókiletti Elshisi Maikl Djon Giffordpen kezdesti, dep habarlaidy "Ult aqparat".
Senat baspasóz qyzmetiniń málimetinshe, kezdesý barysynda parlamentaralyq bailanystar arqyly eki el arasyndaǵy yntymaqtastyqty odan ári nyǵaitý jaiynda sóz boldy. Senat tóraǵasy Qazaqstannyń Eýropa men Aziianyń túiisken tusynda ornalasýynyń strategiialyq mańyzy bar ekenin aityp, elimiz jaqsy investitsiialyq ahýal qalyptastyrýǵa basa mán beretinin jetkizdi.
«Biz óńirde qolaily investitsiialyq ahýal qalyptastyra aldyq. Byltyrǵy qarasha aiynda Memleket basshysynyń tapsyrmasymen Parlament Salyq kodeksine engizilgen túzetýlerdi qabyldady. Investitsiianyń kólemine, merzimine jáne jumys ornyna bailanysty investorlar 10 jylǵa deiin korporativti, jer, qosymsha qun salyqtarynan jáne múlikke salynatyn salyqtan bosatylady», – dedi Máýlen Áshimbaev.
Sonymen qatar Senat tóraǵasy elderimiz arasyndaǵy mádeni-gýmanitarlyq bailanystardyń da nátijeli damyp kele jatqanyn tilge tiek etti. Palata spikeri britaniialyq joǵary oqý oryndary qazaqstandyq stýdentter men QR Tuńǵysh Prezidenti – Elbasynyń bastamasymen qolǵa alynǵan «Bolashaq» baǵdarlamasynyń stipendiattary arasynda joǵary suranysqa ie ekenin de atap ótti. Sondai-aq, ol byltyrǵy qarasha aiynda Ulybritaniiada tarihta alǵash ret aǵylshyn tilinde «Abai. Book of Songs» atty Abai ánderiniń jinaǵy jaryq kórgenin, bul uly oishyldyń muralaryn dáripteýde asa mańyzdy ekenin aitty.
Budan basqa, Máýlen Áshimbaev Ulybritaniia tarapyn osyǵan deiin ótken Álemdik jáne dástúrli dinder liderleriniń sezderine qatysqany úshin alǵys bildirdi. Sondai-aq, anglikan shirkeýiniń ókilderin aldaǵy forýmǵa jáne onyń Hatshylyǵynyń jumysyna qatysýǵa shaqyrdy.
«Bizdiń elimizdiń bastamasymen Álemdik jáne dástúrli dinder liderleriniń sezi ótkizilip kele jatqany belgili. Qazirgi tańda bul Sezd álemdegi rýhani kóshbasshylardyń jańa zamandaǵy ózekti máselelerdi talqylaityn bedeldi forýmyna ainaldy. Biz Anglikan shirkeýiniń basshylyǵyna Sezd Hatshylyǵynyń jumysyna belsendi qatysyp kele jatqany úshin alǵysymyzdy bildiremiz», – dedi Senat Tóraǵasy.
M. Áshimbaev óz sózinde Qazaqstan Parlamentiniń Senaty eki eldiń arasyndaǵy parlamentaralyq yntymaqtastyqty odan ári nyǵaitý úshin tiisti jumysty jalǵastyra beretinine de toqtalyp ótti.
