Memleket basshysy Parlament Senatynyń tóraǵasy Máýlen Áshimbaevty qabyldady, dep habarlaidy "Ult aqparat" Aqordanyń resmi saityna silteme jasap.
Qasym-Jomart Toqaevqa elordada 14-15 qyrkúiek aralyǵynda ótetin Álemdik jáne dástúrli dinder kóshbasshylarynyń VII Sezine daiyndyq barysy jóninde aqparat berildi. Dini forýmǵa qatysýshylar pandemiiadan keiin adamzatty áleýmettik-rýhani baǵytta damytýdaǵy álemdik jáne dástúrli konfessiia kóshbasshylarynyń rólin talqylaidy.
Máýlen Áshimbaevtyń aitýynsha, Sezge joǵary deńgeidegi dini jáne rýhani kóshbasshylar qatysady dep josparlanǵan. Sezd Hatshylyǵy forýmdy uiymdastyrý jáne mazmuny jaǵynan joǵary deńgeide ótkizý úshin belsendi jumys istep jatyr.
Máýlen Áshimbaev Parlamenttiń VII shaqyrylymdaǵy 2-sessiiasynda Senat atqarǵan jumystardyń qorytyndysy jóninde málimet berdi. Qazirgi ýaqytta Parlament 68 zańdy qabyldap, Memleket basshysynyń qol qoiýyna joldady. Senat depýtattary osy sessiia barysynda 18 zań jobasyna bastamashy bolǵan.
Sonymen qatar Memleket basshysyna Konstitýtsiialyq reformalar aiasynda zań shyǵarý protsedýrasyn ońtailandyrý úderisi jóninde aqparat berildi.
