Máýlen Áshimbaev Túrkitildes elderdiń Parlamenttik Assambleiasynyń baiqaýshylarymen kezdesti, dep habarlaidy "Ult aqparat" joǵary palatanyń baspasóz qyzmetine silteme jasap.
Júzdesý barysynda Senat tóraǵasy Qazaqstan sailaýǵa baqylaý júrgizý protsesine basa mán berip otyrǵanyn jáne saiasi naýqandy joǵary deńgeide uiymdastyrý úshin barlyq tiisti sharalardy qolǵa alǵanyn atap ótti.
Óz sózinde Máýlen Áshimbaev aldaǵy Májilis jáne máslihattar sailaýynyń mańyzyna toqtaldy.
«Qazaqstan Respýblikasynyń Tuńǵysh Prezidenti – Elbasy Nursultan Ábishuly Nazarbaevtyń bastamasymen qurylǵan Túrkitildes elderdiń Parlamenttik Assambleiasy qazirgi tańda bedeldi halyqaralyq uiymǵa ainalyp otyr. Sondyqtan TúrkPA ókilderi sailaýdy baqylaýǵa qatysýynyń Qazaqstan úshin mańyzy joǵary», – dedi Senat tóraǵasy.
Sondai-aq, ol Prezident Qasym-Jomart Toqaevtyń bastamasymen elimizdiń saiasi júiesin damytýǵa arnalǵan saiasi reformalar toptamasy qabyldanǵanyna nazar aýdardy. Onyń aitýynsha, Memleket basshysynyń bastamasymen qabyldanǵan zańdar Qazaqstanda kóp partiialylyqty nyǵaitýǵa jáne azamattardyń saiasi úderisterge qatysýyn keńeitýge baǵyttalǵan.
«Prezidentimiz biyl jańa saiasi jańǵyrýlar jariialanatynyn aitty. Osylaisha, Qazaqstan saiasi júieni demokratiialandyrý jáne damytý baǵyttary boiynsha jumystardy jalǵastyra beredi», – dedi Máýlen Áshimbaev.
Sonymen qatar Senat spikeri sailaýdy halyqaralyq normalarǵa sáikes ótkizý úshin barlyq qajetti sharalar qabyldanǵanyn jáne halyqaralyq baiqaýshylarǵa tiisti jaǵdai jasalǵanyn aitty.
