Elordadaǵy Ulttyq akademiialyq kitaphanada ótip jatqan «Shyǵystyń shoqjuldyzdary» atty halyqaralyq konferentsiiada kóne túrki tilindegi Quran kitaby tanystyryldy, dep habarlaidy QazAqparat.
«Biyl - kúlli túrki álemi úshin airyqsha mereili jyl. Sebebi adamzattyń aqyl-oi qazynasyna ólsheýsiz úles qosqan uly tulǵalarymyzdyń mereitoiy qatar kelip otyr.
Olardyń qatarynda túrki halyqtarynyń maqtanyshy, ázerbaijannyń danyshpan shaiyry Nizami Ganjaýidiń týǵanyna 880 jyl toldy. Biyl abyz aqyn, uly oishyl, ózbek halqynyń ǵulamasy Álisher Naýaidiń týǵanyna 580 jyl, al jyr alyby Jambyldyń dúniege kelgenine 175 jyl. Sonymen qatar, uly oishyl aqyn Iýnýs Emreniń dúnieden ótkenine 700 jyl tolyp otyr», - degen Senat tóraǵasy bul ataýly datalardy baýyrlas elderde joǵary deńgeide atap ótkenin eske aldy.
Máýlen Áshimbaev Halyqaralyq túrki akademiiasynyń bastamasymen Nizamidiń dastandary qazaq tiline, Naýaidiń jyrlary qazaq jáne ázerbaijan tilderine aýdarylyp, basylǵanyn atady.
«Búgin sonymen qatar Iýnýs Emreniń jyrlary ana tilimizge tolyq aýdarylyp, alǵash ret qazaq oqyrmandaryna jol tartyp otyr.
Osy rette atalǵan týyndylardy aýdarǵan qazaqtyń kórnekti aqyndary Nesipbek Aitulyna, Svetqali Sabyrǵaliulyna, ǵalym Tóráli Qydyrǵa jáne filologiia ǵylymdarynyń doktory, professor, Ázerbaijannan kelgen meimanymyz Ramiz Askerge alǵysymyzdy bildiremiz», - dedi Senat spikeri.
