QR Parlamenti Senatynyń jalpy otyrysynda «Memleketaralyq standarttaý jónindegi qujattardy taratý týraly kelisimdi ratifikatsiialaý týraly» Zańy qabyldandy, dep habarlaidy "Ult aqparat".
Jobanyń maqsaty - Táýelsiz Memleketter Dostastyǵyna múshe elder arasynda memleketaralyq standarttaý jónindegi qujattardy taratýdyń biryńǵai qaǵidattaryn qalyptastyrý.
«Birinshiden, standarttardy taratýǵa ár elde tek bir uiym ǵana quqyly. Bul standarttaý jónindegi ulttyq organ nemese ol ýákilettik bergen uiym bolýy múmkin. Táýelsiz Memleketter Dostastyǵynyń keibir elderinde standarttardy taratýǵa quqyly ártúrli uiymdar bar. Bizde bul másele sheshildi. Eki jyl buryn kúshine eńgizilgen «Standarttaý týraly» Qazaqstan Respýblikasy Zańy boiynsha bul quqyq Qazaqstan metrologiia jáne standarttaý institýtyna bekitildi. Ekinshiden, Táýelsiz Memleketter Dostastyǵyna múshe memleketterdiń memleketaralyq standarttardy ruqsatsyz taratýdan qorǵaýdy zańnamalyq deńgeide qamtamasyz etý. Bizdiń ulttyq zańnamamyz mundai faktilerdi anyqtaý is-sharalaryn qarastyrmaidy. Osyǵan bailanysty, biz standarttardy ruqsatsyz taratqany úshin ákimshilik aiyppul engizý boiynsha óz usynystarymyzdy daiyndadyq», - dedi Saýda jáne integratsiia ministri Baqyt Sultanov.
Onyń aitýynsha, usynystar Ákimshilik kodekske ózgeristerdiń ortalyqtandyrylǵan paketin qalyptastyrý kezinde esepke alý úshin Ádilet ministrligine jiberildi. Basqa elderde mundai tájiribe bar. Mysaly, Belarýs Respýblikasynda zań buzýshylyqtar úshin aiyppuldar qarastyrylǵan, al memleketaralyq standarttardy ruqsatsyz taratý qyzmeti zańsyz bolyp sanalady.
«Úshinshiden, ózara is-qimyldy úilestirý Standarttar jónindegi biýro arqyly ortalyqtandyrylyp júzege asyrylatyn bolady. Mundai tásil iske asyrylatyn memleketaralyq standarttardy ortalyqtandyrylǵan esepke alýdy, olardy paidalanýdyń zańdylyǵy men qajettiligin qamtamasyz etýge baǵyttalǵan. Búgingi tańda Kelisimge qol qoiǵan kóptegen elder - Resei Federatsiiasy, Belarýs Respýblikasy, Qyrǵyz Respýblikasy, Moldova jáne Ózbekstan Respýblikalary memleketishilik rásimderdi aiaqtady», - dedi ministr.
Osy kelisimdi ratifikatsiialaý mynadai máselelerdi sheshýdi qamtamasyz etedi; m emleket úshin - memleketaralyq standarttardy zańdy taratý, olardy osy zamanǵa beiimdeý úshin quqyqtyq negiz jasaidy; biznes úshin - shyǵyndardy azaitady.
«Jalpy alǵanda, Kelisimniń qabyldanýy taýarlardyń erkin qozǵalysyna jáne halyqaralyq saýda jelisine yqpaldasýǵa jaǵdai jasaidy», - dedi B. Sultanov.
