Senat "Jer qatynastary máseleleri boiynsha keibir zańnamalyq aktilerge ózgerister men tolyqtyrýlar engizý týraly" zań jobasyna túzetýler engizip, Májiliske qaitardy, - dep habarlaidy Tengrinews.kz.
Parlamenttiń joǵarǵy palatasynyń depýtattary zań jobasyna jeke orman ósirý máselesi boiynsha ózgerister engizý qajet dep sheshti. Sondyqtan senatorlar túzetýler engizip qujatty Májiliske jiberýdi uiǵardy.
Zań jobasynyń maqsaty - sheteldikterdiń, azamattyǵy joq adamdardyń, sheteldik zańdy tulǵalardyń, sheteldik qatysýy bar Qazaqstan Respýblikasynyń zańdy tulǵalarynyń, halyqaralyq uiymdardyń, halyqaralyq qatysýy bar ǵylymi ortalyqtardyń, sondai-aq qandastardyń aýyl sharýashylyǵy maqsatyndaǵy jer ýchaskelerin jeke menshik nemese jer paidalaný quqyǵymen ielenýine tyiym salý.
Sondai-aq, zań jobasynda Qazaqstan Respýblikasynyń azamattyǵy toqtatylǵan jáne sheteldik azamattar men zańdy tulǵalar Qazaqstan Respýblikasynyń zańdy tulǵasyna qatysýshylar quramyna kirgen jaǵdailarda aýyl sharýashylyǵy maqsatyndaǵy jerlerdi ielikten shyǵarý máseleleri reglamenttelgen.
"Jer - halqymyzdyń basty bailyǵy, táýelsizdigimizdiń simvoly. Sondyqtan jer máselesiniń strategiialyq mańyzy zor. Bul zań jobasy aýyl sharýashylyǵy maqsatyndaǵy jer ýchaskelerin sheteldikterge, azamattyǵy joq adamdarǵa, sheteldik zańdy tulǵalarǵa jáne qandastarǵa satýǵa jáne jalǵa berýge tyiym salady.
Sondai-aq, qujatta Qazaqstan Respýblikasynyń azamattyǵy toqtatylǵan jáne sheteldik azamattar men zańdy tulǵalar Qazaqstan Respýblikasynyń zańdy tulǵasyna qatysýshylar quramyna kirgen jaǵdailarda aýyl sharýashylyǵy maqsatyndaǵy jerlerin ielikten shyǵarý rásimi kózdelgen. Jalpy, bul zań jobasy eń aldymen halyq pen memleket múddesin qorǵaidy", - dedi Senat tóraǵasynyń orynbasary Nurlan Ábdirov palata otyrysynda.
Osylaisha zań jobasy qabyldanǵan jaǵdaida aýyl sharýashylyǵy maqsatyndaǵy jerlerge Qazaqstan Respýblikasynyń azamattary men sheteldik qatysýy joq Qazaqstan Respýblikasynyń zańdy tulǵalary ǵana ie bola alady.
Eldegi jer máselelerin zańnamalyq retteý osy Zań qabyldanǵannan keiin jalǵastyrylady.
Aita keteiik, jaqynda bes senator qatysqan jer komissiiasy óz jumysyn aiaqtaǵan bolatyn. Komissiia otyrysy barysynda osy saladaǵy zańnamany jetildirýge qatysty kóptegen usynystar aitty. Usynystardy eskere otyryp, Úkimet qazirgi ýaqytta jer paidalaný salasynda zańnamalyq túzetýler toptamasyn ázirlep jatyr. Sońǵy otyrysta qazaqstandyqtar úshin aýyl sharýashylyǵy jerlerin satýǵa moratoriidi bes jylǵa uzartý týraly sheshim qabyldanǵan edi.
