Senatorlar memlekettik bastamalardy Elbasymen kelisý qajettiligin joiýdy usynady. Bul norma palatanyń jalpy otyrysynda senatorlar qaraǵan "Tuńǵysh Prezident - Elbasy týraly" Konstitýtsiialyq zańda jazylǵan, - dep habarlaidy Tengrinews.kz tilshisi.
Senat otyrysynda depýtattar "Tuńǵysh Prezident – Elbasy týraly" konstitýtsiialyq zańǵa túzetýlerdi maquldady, sondai-aq "Qaýipsizdik Keńesi týraly" jáne "Qazaqstan halqy Assambleiasy týraly" Zańdarǵa buryn usynylǵan ózgerister men tolyqtyrýlardy talqylady. Túzetýlerde Elbasynyń Qaýipsizdik Keńesinde jáne Qazaqstan Halqy Assambleiasynda ómir boiy tóraǵalyq etý quqyǵynyń kúshin joiý kózdelgen.
Senatorlar óz usynysyn qosyp, zań jobasyn Májiliske qaita qaraýǵa qaitardy.
"Senatorlar zańnamaǵa engizilip otyrǵan memleketimizdiń Qaýipsizdik Keńesin, Qazaqstan Halqy Assambleiasyn memleket basshysy óziniń qyzmetine sáikes basqarýy tiis degen ózgeristerdi qoldady. Sonymen qatar zańdy talqylaý barysynda bir norma engizilip otyr. Ol – "Tuńǵysh Prezident týraly" zańnan memlekettiń ishki jáne syrtqy saiasatyna bailanysty bastamalardy Elbasymen kelisilýge tiis degen norma alyp tastalyp otyr. Sondyqtan da Senat zańnamaǵa engizilgen ózgeristerdi tujyrymdamaly túrde qoldap, bir ózgerispenen Májiliske qaitaryp otyr", - dedi senator Lázzat Súleimen.
Endi bul túzetýdi Májilis depýtattary qarap, qabyldanǵan jaǵdaida zań jobasy Prezidenttiń qol qoiýyna jiberiledi.
