Parlament Senatynyń jalpy otyrysynda «Kaspii teńiziniń teńiz ortasyn qorǵaý jónindegi negizdemelik konventsiiaǵa qorshaǵan ortaǵa transshekaralyq turǵydan jasalatyn áserdi baǵalaý jónindegi hattamany ratifikatsiialaý týraly» Zańy qabyldandy, dep habarlaidy QazAqparat.
«Kaspii teńizinde kómirsýtegi shikizatynyń iri qorynyń bolýy sý qoimasynyń ekologiiasy men biologiialyq resýrstaryn saqtaý máselesin ózekti etedi. Qorshaǵan ortany qorǵaý salasyndaǵy yntymaqtastyqtyń sharttyq bazasyn keńeitý maqsatynda Qazaqstan Negizdemelik konventsiiaǵa birqatar hattamalarǵa qol qoidy. Solardyń biri - 2018 jylǵy 20 shildedegi Máskeýde Kaspii mańy memleketteri: Ázerbaijan Respýblikasy, Iran Islam Respýblikasy, Resei Federatsiiasy Túrkmenstan jáne Qazaqstan Respýblikasy qol qoiǵan transshekaralyq kontekste qorshaǵan ortaǵa áserdi baǵalaý týraly hattama. Hattamamen retteýge jatatyn qyzmet túrleri anyqtaldy. Mysaly: munai óńdeý zaýyttary, jylý qýaty 300 megavatt nemese odan joǵary jylý elektr stantsiialary men basqa da janý qondyrǵylary, atom elektr stantsiialary men basqa da atom reaktorlary, avtomobil joldaryn salý, rekonstrýktsiialaý jáne basqada qyzmet túrleri», - dedi QR Ekologiia, geologiia jáne tabiǵi resýrstar ministri Serikqali Brekeshev.
Onyń aitýynsha, konventsiia erejelerin iske asyrý úshin 2021 jylǵy 1 shildede kúshine engen Qazaqstan Respýblikasynyń Ekologiialyq kodeksinde transshekaralyq ekologiialyq áserdi retteý, olardy júzege asyrý tártibi, quqyqtary men mindetteri bekitilgen.
«Qazaqstannyń transshekaralyq áserlerdiń paida bolý taraby retinde qatysýy, qorshaǵan ortaǵa áserdi baǵalaý rásimi el ishinde de, qatysty Taraptar arasynda da qatar júrgiziledi. Mysaly, Kaspiide jańa obektiler salynǵan jaǵdaida qorshaǵan ortaǵa áserdi baǵalaý materialdary tiisti ákimshilik-aýmaqtyq birlikterdiń jergilikti atqarýshy organdaryna jáne múddeli memlekettik organdarǵa, sondai-aq qatysty Taraptarǵa qatar jiberiledi. Qoǵamdyq tyńdaýlarda kóterilgen máseleler boiynsha túpkilikti sheshimdi qorshaǵan ortany qorǵaý salasyndaǵy ýákiletti organ, qajet bolǵan jaǵdaida múddeli memlekettik jáne memlekettik emes organdardy tarta otyryp qabyldaidy», - dedi ministr.
Óz kezeginde Senattyń Agrarlyq máseleler, tabiǵatty paidalaný jáne aýyldyq aýmaqtardy damytý komitetiniń múshesi Ábdáli Nuraliev Hattamanyń erejeleri transshekaralyq turǵyda Qorshaǵan ortaǵa áserdi baǵalaýǵa qatysty halyqaralyq quqyqqa sáikes Ýaǵdalasýshy Taraptardyń kez kelgen mindettemelerine nuqsan keltirmeitinin aitty. Transshekaralyq ekologiialyq áserdi retteý QR jańa Ekologiialyq kodeksiniń 80-84 baptarynda qarastyrylǵan.
