Parlament Senatynyń jalpy otyrysynda palata depýtattary «Astyq týraly» Qazaqstan Respýblikasynyń Zańyna tolyqtyrýlar engizý týraly» Zańyn qabyldady, dep habarlaidy QazAqparat.
Zań jobasy Parlament depýtattarynyń bastamashylyǵymen ázirlendi.
Qujat tabiǵi, tehnogendik jáne áleýmettik sipattaǵy tótenshe jaǵdailar týyndaǵan ári tótenshe jaǵdai engizý kezinde eldi azyq-túliktik astyqpen kepildi túrde qamtamasyz etý máselesin retteý, «Azyq-túlik kelisimshart korporatsiiasy» Ulttyq kompaniiasy» AQ-nyń astyqtyń rezervtik qoryn saqtaý shyǵyndaryn óteý, onyń AÓK-degi mártebesi men rólin aiqyndap, azyq-túlik qaýipsizdigin qamtamasyz etýdi kózdeidi.
«Búginde azyq-túlik qaýipsizdigi astyqpen tolyǵymen qamtylǵan memleketter úshin de óte ózekti máselege ainalyp otyr. Sondyqtan da, astyq óndirýdegi elimizdiń joǵary resýrstyq áleýetine qaramastan, halyqty azyq-túlikpen qamtý jáne baǵany turaqtandyrýda memlekettiń jaýapty is-áreketteri mańyzdy. Zań jobasynda «astyqtyń rezervtik qory», «astyq naryǵy jónindegi operator», «astyqtyń rezervtik qoryn basqarý» uǵymdaryn engizý kózdelgen. Sondai-aq, ýákiletti organǵa astyq naryǵyn retteýde tiisti quzyrettilik berý usynylady», - dedi Senat depýtaty Dúisenǵazy Mýsin.
Sonymen qatar, zań jobasynyń normalary ishki astyq naryǵyn turaqtandyrýǵa, tuqym jáne jemshóp qorlaryn qalyptastyrý arqyly birqatar salanyń ónimdiligin arttyrýǵa áser etedi dep josparlanǵan.
«Zań jobasyndaǵy tolyqtyrýlar ishki astyq naryǵyna retteýshilik áser etip, óńirlik turaqtandyrý qorlaryn qalyptastyrýǵa járdemdesý arqyly halyqty qoljetimdi astyq ónimderimen qamtamasyz etýge baǵyttalǵan. Zań jobasyn qabyldaý teris áleýmettik-ekonomikalyq jáne quqyqtyq saldarǵa ákep soqtyrmaidy, sonymen qatar, astyqtyń rezervtik qoryn saqtaý úshin respýblikalyq biýdjetten jyl saiyn 2,4 mlrd teńge kóleminde qarjylandyrýdy talap etedi», - dedi senator.
