Biyl Baiqońyr qalasy men Tóretam eldi mekenin damytýǵa 2,1 mlrd teńge jumsalady. Bul týraly Qarjy vitse-ministri Erbol Qarashókeev aitty, dep habarlaidy "Ult aqparat".
«1994 jylǵy 10 jeltoqsandaǵy Qazaqstan Respýblikasynyń Úkimeti men Resei Federatsiiasynyń Úkimeti arasyndaǵy «Baiqońyr» keshenin jalǵa berý shartyna ózgeris engizý týraly hattamany ratifikatsiialaý týraly» zań jobasyn talqylaý kezinde Senat depýtaty Bekbolat Orynbekov Baiqońyrdaǵy orta bilim máselesin kóterdi.
«Tarihi ǵarysh kesheni ornalasqan 76 myńnan asatyn turǵyny bar, onyń ishinde 49 myńnan astam Qazaqstan Respýblikasynyń azamaty bar Baiqońyr qalasyn damytý kezeńinde birqatar problema týyndap otyr. Atap aitqanda, Resei tarapynan qoldanystaǵy ifnraqurylymdy kútip ustaýǵa ǵana qarajat bólinýde. Qaladaǵy turǵyn úi qory jańartylmaidy jáne injenerlik infraqurylym men áleýmettik nysandardyń tozyǵy jetken. Qazaqstan tarapy da qoldanystaǵy zańnamalar negizinde Baiqońyr qalasynyń infraquyrylym jobalaryn tikelei qarjylandyra almaidy. Sonymen qatar qarjy jetispeýshiligi saldarynan QR azamattaryn sapaly bilimmen qamtamasyz etý kezeńinde problema oryn alyp otyr, Atap aitqanda, qalada 9200 oqýshy tálim alatyn 12 mektep bar. Onyń ishinde Resei Federatsiiasynyń 7 mektebinde 4000 oqýshy jáne Qazaqstannyń 5 mektebinde 5200 oqýshy bilim alýda. Reseilik mektepterdegi 4000 oqýshynyń 1408-i – Qazaqstan Respýblikasynyń azamattary. Olardyń reseilik bilim berý baǵdarlamasyn oqýyna bailanysty memlekettik grantpen joǵary oqý ornyna túsý kezinde qiyndyqtar týyndaidy», - dedi depýtat.
Senat ókili qaladaǵy 11 myń páterdiń iesi óz baspanalaryn óz attaryna qarata almai júrgenin de eske saldy.
«Qoldanystaǵy zańnamalarǵa ózgeris engizip, jalǵa alý kezinde tólenetin túsimder esebinen Baiqońyr qalasy men oǵan irgeles jatqan Tóretam men Aqai eldi mekenderin damytýdy qarjylandyrý jumystary qashan jáne qalai iske asyrylmaq? Baiqońyr qalasynyń 11606 páterinde turyp jatqan QR azamattarynyń baspanasyn jekeshelendirý máselesi qashan jáne qalai sheshimin tabady», - dep surady Bekbolat Orynbekov.
Qarjy vitse-ministri Erbol Qarashókeevti aitýynsha, «Baiqońyr» kesheninen túsip jatqan jaldaý aqysyn nysanaly túrde Baiqońyr qalasy men Tóretam, Aqai eldi mekenderiniń damýyna jiberý –tujyrymdamalyq másele.
«Múddeli memlekettik organdar arasynda ol másele talqylanǵan. Túsip jatqan jaldaý aqysy negizi salyq emes túsim bolǵandyqtan, biryńǵai biýdjetke túsedi. Onyń bir bóligin arnaiy túrde bólip alyp, osy eldi mekenderdiń damýyna jiberý múmkin emes. Sebebi ol biýdjettik printsipterge qaishy keledi», - degen ministrlik ókili soǵan qaramastan, osy eldi mekenderdiń, Baiqońyr qalasynyń infraqurylymyn qarjylandyrýǵa tolyq múmkindik bar ekenin atady.
«2021 jyly Baiqońyr qalasy men Tóretam eldi mekenin qarjylandyrý úshin nysanalyq transfert arqyly biýdjetten 2,5 mlrd teńge quiý josparlanǵan. Jalpy Qyzylorda oblysyna respýblikalyq biýdjetten 22,7 mlrd teńge kózdelip otyr. Sol sebepti múmkinshilik bar. Nysanaly transfert arqyly osy maqsattarǵa aqshany jiberýge daiynbyz. Ol úshin árbir ministrlik óz quzyretterinde bizge usynystaryn engizýi qajet», - dedi vitse-ministr.
Vedomstvo ókili Baiqońyr qalasyndaǵy 11 myńnan astam páterdi jekeshelendirý máselesin birjola sheshýge baǵyttalǵan protses bastalǵanyn da aitty.
«Ol úshin qoldanystaǵy turǵyn úi zańnamasyn ózgerister engizýdiń qajeti joq. Birinshiden, ol Qyzylorda oblysynyń ákimdiginiń quzyreti. Jekeshelendirý protsesin bastaý úshin áýeli oblys ákimdigi sol páterlerdi Resei tarapynyń jaldaýynan shyǵarýy kerek. Jaldaýdan shyǵarý úshin «Baiqońyr» kesheniniń máseleleri jónindegi úkimetaralyq komissiianyń kún tártibine engizip, Resei tarapynan, «Baiqońyr» ákimshiliginen kelisim alý kerek. Reseidiń jaldaýynan shyǵarylǵannan keiin Qyzylorda oblysy ákimdiginiń kommýnaldyq menshigine ótkizip, osyndan keiin qoldanystaǵy zańnama boiynsha jekeshelendirý protsesi júrgiziledi. Ol jumys bastaldy, qazir júrgizilip jatyr», - dedi Erbol Qarashókeev.
