QR Parlament Senatynyń otyrysynda depýtattar eldegi tártipsizdikter kezinde kóz jumǵan beibit turǵyndar men kúshtik qurylym qyzmetkerleriniń jaqyndaryna kóńil aitty, dep habarlaidy QazAqparat.
Senat otyrysyn bastaǵan tóraǵa Máýlen Áshimbaev qańtardyń alǵashqy kúnderindegi tártipsizdikter Táýelsizdik tarihyndaǵy eń qasiretti oqiǵa retinde este qalatynyn atady.
«Ókinishke qarai, kúshtik qurylymdardyń biraz qyzmetkeri qaza boldy. Biz olardyń erlikterin eshqashan umytpaimyz. Terroristerdiń qolynan jazyqsyz jandar da qaitys boldy. Qaza bolǵan azamattarymyzdyń otbasylary men jaqyndaryna qaiǵylaryna ortaqtasyp, kóńil aitamyz. Jaraqattanǵan adamdardyń tezirek saýǵyp ketýine tilektestigimizdi bildiremiz», - dedi Máýlen Áshimbav.
Bul sózge Senat depýtaty Nariman Tóreǵaliev te qosyldy.
«Saýalymyzdy joldaýdan buryn memleketimizge, elimizdiń konstitýtsiialyq qurylymyna qarsy jasalǵan shabýyl men búliktiń saldarynan qaitys bolǵan beibit turǵyndardyń, quqyq qorǵaý qyzmetkerleri men áskerilerdiń otbasyna qaiǵyryp kóńil aitamyz. Táýelsiz elimizdiń tutastyǵynyń kepili retinde Prezident Qasym-Jomart Kemeluly Toqaev syndarly shaqta shuǵyl ári batyl qadamdar jasap mańyzdy sheshimder qabyldady», - dedi senator.
