Semei qalasynyń turǵyndary Ridderdegi órtten zardap shekkenderge kómek kórsetýdi jalǵastyrýda, dep habarlaidy "Ult aqparat".
Qalalyq Aqparat ortalyǵy taratqan málimetke súiensek, jergilikti turǵyndar men kásipkerler Ridderdegi órtten baspanasynan aiyrylǵan otbasylarǵa 18,9 mln teńge somasynda qarjylai kómek kórsetti.
«Budan bólek, ridderlikterge gýmanitarlyq kómek jiberiledi. «Qarajyra« AQ ókilderi zardap shekkenderge 1,3 tonna azyq-túlik ónimderin jóneltti. Sondai-aq 200 keli qant, 584 keli tary, qaraqumyq, arpa jarmasy, kúrish, 100 keli makaron ónimderi, 20 keli tomat pastasy, 15 keli shái, 50 litr ósimdik maiy, 48 litr sút jiberilgen», - delingen habarlamada.
«Qazelektromash» JShS barlyq júkti Ridder qalasyna jetkizýdi qolǵa alǵan. Al «Alel «FIK» AQ óz tarapynan 30 tonnaǵa jýyq gýmanitarlyq kómek jetkizdi.
Aita keteiik, «Nur Otan« partiiasynyń Semei qalalyq filialy zardap shekkenderge kómek kórsetý aktsiiasyn jariialaǵan. Sonyń nátijesinde shahar turǵyndary ridderlikterge qolushyn sozyp jatyr.
Esterińizge sala ketsek, 10 mamyr kúni ShQO-daǵy Ridder orman sharýashylyǵynda órt shyqty. Dala órti 310 gektar aýmaqty sharpyp, 1 adam qaza tapty. Órtke bailanysty shuǵyl jeli iske qosyldy. Memleket basshysy Qasym-Jomart Toqaev Úkimet pen Shyǵys Qazaqstan oblysynyń ákimdigi órtten zardap shekken Leshoz kentiniń turǵyndaryna kómek kórsetip, baspanamen qamtamasyz etýdi tapsyrdy. Politsiia qyzmetkerleri órtke qatysty kúdiktini ustady.
