Semeilik traktorshy óz qarajatyna Álihan Bókeihanǵa eskertkish qoidy. Er adam qymbatqa túsken monýment demontajdala ma dep alańdap otyr, - dep habarlaidy kaz.tengrinews.kz.
Traktorshy "Alash" qozǵalysynyń kóshbasshysyna eskertkish qoiý ideiasyn tórt jyl boiy oilastyryp júrgen. Alaida birden kirisip ketýge qarjy máselesi toqtaý salǵan. 2016 jyly Álihan Bókeihannyń 150 jyldyǵynda Berikhan Jumadilov sheshim qabyldap, qarajat jinai bastaidy. Ol 500 myń teńge jinaidy. Osy qarajatpen ol jergilikti músinshilerge barǵan.
"Olar meniń tanystarym. Óz isiniń sheberi. Olar saiasi qairatkerlerdiń qoqystan taýyp alǵan eski biýstterin restavratsiialaýǵa kómektesken edi. Tarihymyz ǵoi dep, jinap júrmin. Ótken jyly táýelsizdigimizdiń 25 jyldyǵyn atap óttik. Bul sol táýelsizdikke birinshi bolyp kúresken Álihan Bókeihannyń 150 jyldyǵymen tuspa-tus keldi ǵoi", - deidi Berikhan Jumadilov.
Eskertkishti jasaýǵa birneshe ai qajet bolǵan. Jinalǵan barlyq qarajat materialǵa ǵana jumsalypty.
"Biz kompozit materialdy qoldandyq, onyń quramynda tsement belgili bir proportsiiada bar, bul quram óte jaqsy qoldanylyp keledi. Tastan da jasaýǵa bolar edi, biraq qymbatqa túser edi. Bul materialmen de eskertkish kóp jyl turady, qandai aýa raiy bolsa da myzǵymaidy. Obrazdy portretine qarap saldyq. Monýmentti tarihi tulǵanyń boiymen túgeldei aldyq. Álihan Bókeihannyń paraq ustap turǵan beinesin saldyq, partiialastaryna "Alashtyń" Jarlyǵyn oqyp turǵan sáti shyǵar. Eskertkish kvartspen qaptalǵan, ústinen qola jalatylǵan", - deidi músinshi Bolat Káribaev.
Eskertkish Ertis ózeniniń jaǵasynda ornalasty. Osy mańda onyń avtory - traktorshy Berikhan Jumadilov turady. Er adam jergilikti turǵyndardy shaqyryp, saltanatty túrde ashqysy kelgen, alaida endi bul eńbegi kúiip kete me dep alańdap otyr.
"Eskertkishti demontajdaý kerek shyǵar. Sóitsek, ákimdik qarsy eken. Adamdar qaita-qaita keldi. Muny zańsyz dep, ideiamnan bas tartýymdy surady. Bastapqyda zańdy túrde jerdi tirkep, ruqsat alýym kerek edi. Osyndai eskertýler jasala bastaǵanda eskertkishti qoiýǵa asyqpadyq. Bireý-mireý satyp ala ma dep te oiladyq. Biraq eskertkish jasalyp qoidy ǵoi. Sheberhanada turǵanyna úsh ai boldy. Sosyn sheberler ony maǵan berip, men óz kezegimde ony ornatyp qoidym. Endi alyp tastaý kerek dep jatyr. Ókinishti. Bul aq nietimizden jasalǵan dúnie ǵoi. Qanshama eńbek pen qarajat", - deidi traktorshy.
Sóitsek, qalalyq ákimdik Álihan Bókeihanǵa eskertkish qoiǵaly jatyr eken. Qarajat ta qarastyrylǵan, konkýrs ta ótip qoiǵan.
