سەمەيلٸك تراكتورشى ٶز قاراجاتىنا ەليحان بٶكەيحانعا ەسكەرتكٸش قويدى. ەر ادام قىمباتقا تٷسكەن مونۋمەنت دەمونتاجدالا ما دەپ الاڭداپ وتىر, - دەپ حابارلايدى kaz.tengrinews.kz.
تراكتورشى "الاش" قوزعالىسىنىڭ كٶشباسشىسىنا ەسكەرتكٸش قويۋ يدەياسىن تٶرت جىل بويى ويلاستىرىپ جٷرگەن. الايدا بٸردەن كٸرٸسٸپ كەتۋگە قارجى مەسەلەسٸ توقتاۋ سالعان. 2016 جىلى ەليحان بٶكەيحاننىڭ 150 جىلدىعىندا بەرٸكحان جۇمادٸلوۆ شەشٸم قابىلداپ, قاراجات جيناي باستايدى. ول 500 مىڭ تەڭگە جينايدى. وسى قاراجاتپەن ول جەرگٸلٸكتٸ مٷسٸنشٸلەرگە بارعان.
"ولار مەنٸڭ تانىستارىم. ٶز ٸسٸنٸڭ شەبەرٸ. ولار ساياسي قايراتكەرلەردٸڭ قوقىستان تاۋىپ العان ەسكٸ بيۋستتەرٸن رەستاۆراتسييالاۋعا كٶمەكتەسكەن ەدٸ. تاريحىمىز عوي دەپ, جيناپ جٷرمٸن. ٶتكەن جىلى تەۋەلسٸزدٸگٸمٸزدٸڭ 25 جىلدىعىن اتاپ ٶتتٸك. بۇل سول تەۋەلسٸزدٸككە بٸرٸنشٸ بولىپ كٷرەسكەن ەليحان بٶكەيحاننىڭ 150 جىلدىعىمەن تۇسپا-تۇس كەلدٸ عوي", - دەيدٸ بەرٸكحان جۇمادٸلوۆ.
ەسكەرتكٸشتٸ جاساۋعا بٸرنەشە اي قاجەت بولعان. جينالعان بارلىق قاراجات ماتەريالعا عانا جۇمسالىپتى.
"بٸز كومپوزيت ماتەريالدى قولداندىق, ونىڭ قۇرامىندا تسەمەنت بەلگٸلٸ بٸر پروپورتسييادا بار, بۇل قۇرام ٶتە جاقسى قولدانىلىپ كەلەدٸ. تاستان دا جاساۋعا بولار ەدٸ, بٸراق قىمباتقا تٷسەر ەدٸ. بۇل ماتەريالمەن دە ەسكەرتكٸش كٶپ جىل تۇرادى, قانداي اۋا رايى بولسا دا مىزعىمايدى. وبرازدى پورترەتٸنە قاراپ سالدىق. مونۋمەنتتٸ تاريحي تۇلعانىڭ بويىمەن تٷگەلدەي الدىق. ەليحان بٶكەيحاننىڭ پاراق ۇستاپ تۇرعان بەينەسٸن سالدىق, پارتييالاستارىنا "الاشتىڭ" جارلىعىن وقىپ تۇرعان سەتٸ شىعار. ەسكەرتكٸش كۆارتسپەن قاپتالعان, ٷستٸنەن قولا جالاتىلعان", - دەيدٸ مٷسٸنشٸ بولات كەرٸباەۆ.
ەسكەرتكٸش ەرتٸس ٶزەنٸنٸڭ جاعاسىندا ورنالاستى. وسى ماڭدا ونىڭ اۆتورى - تراكتورشى بەرٸكحان جۇمادٸلوۆ تۇرادى. ەر ادام جەرگٸلٸكتٸ تۇرعىنداردى شاقىرىپ, سالتاناتتى تٷردە اشقىسى كەلگەن, الايدا ەندٸ بۇل ەڭبەگٸ كٷيٸپ كەتە مە دەپ الاڭداپ وتىر.
"ەسكەرتكٸشتٸ دەمونتاجداۋ كەرەك شىعار. سٶيتسەك, ەكٸمدٸك قارسى ەكەن. ادامدار قايتا-قايتا كەلدٸ. مۇنى زاڭسىز دەپ, يدەيامنان باس تارتۋىمدى سۇرادى. باستاپقىدا زاڭدى تٷردە جەردٸ تٸركەپ, رۇقسات الۋىم كەرەك ەدٸ. وسىنداي ەسكەرتۋلەر جاسالا باستاعاندا ەسكەرتكٸشتٸ قويۋعا اسىقپادىق. بٸرەۋ-مٸرەۋ ساتىپ الا ما دەپ تە ويلادىق. بٸراق ەسكەرتكٸش جاسالىپ قويدى عوي. شەبەرحانادا تۇرعانىنا ٷش اي بولدى. سوسىن شەبەرلەر ونى ماعان بەرٸپ, مەن ٶز كەزەگٸمدە ونى ورناتىپ قويدىم. ەندٸ الىپ تاستاۋ كەرەك دەپ جاتىر. ٶكٸنٸشتٸ. بۇل اق نيەتٸمٸزدەن جاسالعان دٷنيە عوي. قانشاما ەڭبەك پەن قاراجات", - دەيدٸ تراكتورشى.
سٶيتسەك, قالالىق ەكٸمدٸك ەليحان بٶكەيحانعا ەسكەرتكٸش قويعالى جاتىر ەكەن. قاراجات تا قاراستىرىلعان, كونكۋرس تا ٶتٸپ قويعان.
