Semeide №28 mekteptiń oqýshylary sport jáne akt zaly men muǵalimder bólmesinde oqyp jatyr, dep habarlaidy QazAqparat.
Qazir shatyry tesik mektepke jóndeý jumystary júrgizilýde. Uzaq jyl jóndeý kórmegen bilim oshaǵy biyl jóndeletin mektepter tizimine engen. Tender jariialanyp, jeńimpaz anyqtalǵannan keiin merdiger mekeme jumysty bastap ketken. Sondyqtan eki aýsymda bilim alatyn myńǵa jýyq oqýshy sport jáne akt zaly men muǵalimder bólmesinde oqýǵa májbúr. Mekteptiń shatyry eskirgen. Jańbyr jaýsa tóbesi tesik mekteptiń ishi sýǵa tolady. Sondyqtan keler oqý jylyna deiin jumysty aiaqtaý úshin merdiger jóndeýdi erte bastaǵan kórinedi. Alaida ata-analar balalary úshin alańdaýly.
«Men oqýshylar úshin ýaiymdaimyn. Mekteptiń tóbesi óte juqa. Al joǵary synyp oqýshylary qazir sportzalda bilim alýda. Al bastaýysh synyp oqýshylary dálizde oqýda. Eń úlken qaýip - bul shatyrdyń tóbesinen qulap jatqan kirpish pen tastar. Oqý jylynyń sońyn tospai jóndeýdi bastap ketkenderine narazymyz», - deidi ata-analardyń biri Valentin Pimonov.
Ata-analardyń sózinshe, mekteptegi sońǵy qońyraý da jóndeý jumystaryna bailanysty merziminen buryn ótpek.
