Qazaqstan Úkimeti Semei qalasyna erekshe tarihi ortalyq mártebesin berý máselesin pysyqtaidy. Bul jaiynda Májilis depýtattarynyń saýalyna berilgen QR Premer-Ministri Asqar Maminniń jaýabynda aitylǵan, dep habarlaidy "Ult aqparat".
«1997 jyly Qazaqstan Respýblikasynyń ákimshilik-aýmaqtyq qurylymyn jetildirý maqsatynda Qazaqstan Respýblikasy Prezidentiniń 1997 jylǵy 23 mamyrdaǵy № 3528 Jarlyǵyna sáikes Semei oblysy Shyǵys Qazaqstan oblysynyń aýmaǵyna qosylǵan bolatyn. Semei qalasynyń aýmaǵy 27,8 myń sh.m quraidy (2 kenttik jáne 32 aýyldyq eldi meken bar). 2019 jylǵy 1 qarashada halyq sany 349,9 myń adam boldy. Shekara aýmaǵy burynǵydai al ortalyǵy Semei qalasynda bolatyn jańa ákimshilik-aýmaqtyq birlik qurý jáne respýblikalyq mańyzy bar qala mártebesin berý eleýli biýdjet shyǵyndaryna alyp keledi. Onyń ishinde: qala ákiminiń, qalalyq máslihat apparattaryn, qala basqarmalaryn, sondai-aq ortalyq memlekettik organdardyń aýmaqtyq bólimshelerin qurýdy jáne ustaýdy; qurylatyn memlekettik organdardy jabdyqtaýdy (ákimshilik ǵimarattardy salý jáne jalǵa alý, jihaz, qyzmettik kólik, kompiýterlik, keńse tehnikasyn jáne basqalardy satyp alý) kerek etedi. Buǵan qosa memlekettik uiymdardyń, mekemelerdiń jáne kásiporyndardyń filialdaryn qurý qajet bolady», - dep atap ótedi Úkimet basshysy.
Onyń atap ótýinshe, qarajatty áleýmettik jáne injenerlik infraqurylymdy damytýǵa, shaǵyn jáne orta biznesti qoldaýǵa, eldi mekenderdi abattandyrýǵa, jańa jumys oryndaryn qurýǵa jumsaý neǵurlym tiimdi. Bul qalanyń damýyna serpin beredi. Máselen, búgingi kúni Semei qalasynyń jáne onyń ákimshilik aýmaǵynyń áleýmettik-ekonomikalyq damýyna, halyqtyń ómir súrý sapasyn arttyrýǵa erekshe kóńil bólinedi. Semei qalasynyń biýdjeti aǵymdaǵy jyly 2018 jylmen salystyrǵanda 48 paiyz, 2014 jylmen salystyrǵanda 2,8 ese ósip, 66,4 mlrd teńgeni qurady. Qarjylandyrý kóleminiń aitarlyqtai ulǵaitylýy qalanyń áleýmettik salasyn, sondai-aq infraqurylymyn damytýdaǵy negizgi máselelerin sheshýge múmkindik berdi. Joldardyń jai-kúiin jaqsartýǵa úlken kóńil bólingen. Sońǵy eki jylda 58 shaqyrym avtomobil jolyna jóndeý jumystary júrgizildi. Qazaqstannyń Damý bankimen birlesip, «Semei qalasynyń qoǵamdyq kóligin jańartý» jobasy boiynsha 170 jańa avtobýs satyp alyndy. Qalany jáne onyń biýdjettiń 4-deńgeiine ótken 6 aýyldyq okrýgin abattandyrýǵa 2019 jyly shamamen 1,7 mlrd teńge bólindi. Sý qubyry jelileri bar «Zaton» sý toǵanyn rekonstrýktsiialaý aiaqtalyp, Tihomirovskaia tarmaǵy mańaiynda Ertis ózen arqyly ótetin káriz diýkerin, Stepnoi kenti sý qubyryn jáne Muqyr aýylynda sý qubyry jelilerin qaita qurý jumystary bastaldy. Semei qalasynda kópfýnktsionaldy mádeni-sport kesheniniń qurylysy aiaqtaldy. Eýropalyq qaita qurý jáne damý bankimen qalanyń sýmen jáne jylýmen jabdyqtaý júielerin, qalanyń kóshelerin jaryqtandyrýdy jańǵyrtý boiynsha 3 jobaǵa kredittik shart jasalyp, iske asyrylýy bastaldy. Turǵyn úi qurylysy aiasynda 2019 jyly 12 kópqabatty turǵyn úi paidalanýǵa berildi. Bul 695 otbasyn baspanamen qamtamasyz etýge múmkindik týdyrdy. Budan basqa QR Prezidenti Q.K. Toqaevtyń Shyǵys Qazaqstan oblysyna saparynyń qorytyndylary boiynsha berilgen tapsyrmasyna sáikes Qazaqstan Respýblikasy Úkimetiniń 2019 jylǵy 8 qańtardaǵy № 742 qaýlysymen Shyǵys Qazaqstan oblysynyń Semei qalasyn áleýmettik-ekonomikalyq damytýdyń 2020-2025 jyldarǵa arnalǵan keshendi jospary bekitildi. Bes jyldyq josparda turǵyn úi qurylysyn damytýǵa, sýmen jáne jylýmen jabdyqtaý júielerin, avtomobil joldaryn, qoǵamdyq kólikti, áleýmettik obektilerdi (mektepter, balabaqshalar, aýrýhanalar, sporttyq modýlder jáne t.b.) jańǵyrtýǵa 260,2 mlrd teńge somaǵa 56 is-sharany iske asyrý kózdelgen. Sonymen qatar Elbasynyń tapsyrmasyn oryndaý maqsatynda oblystyq máslihat sessiiasynyń 2019 jylǵy 5 qarashadaǵy № 34/385-VI sheshimi negizinde Semei qalasynyń 2050 jylǵa deiingi damý strategiiasy bekitildi. Strategiia orta merzimdi kezeńge josparlaýdy, qala aýmaǵyn damytý baǵdarlamalaryn, áleýmettik-ekonomikalyq damý boljamdaryn, keshendi damý josparlaryn, bas josparyn, sondai-aq qala aýmaǵyn jinaqy salý josparlaryn qalyptastyrý úshin negiz bolyp tabylady.
«Búgingi tańda Úkimet pen Shyǵys Qazaqstan oblysynyń ákimdigi qabyldaǵan sharalar semeilikterdiń ómir súrý sapasyn aitarlyqtai jaqsartýǵa jáne onyń odan ári áleýmettik-ekonomikalyq damýy men ózin-ózi qamtamasyz etýi úshin jaǵdai jasaýǵa múmkindik beredi. Sonymen birge Qazaqstan Respýblikasy Prezidentiniń tapsyrmasyna sáikes Úkimet Semei qalasyna erekshe tarihi ortalyq mártebesin berý máselesin pysyqtaityn bolady. Joǵaryda aitylǵandardyń negizinde búgingi kúni Semei qalasyna respýblikalyq mańyzy bar qala mártebesin berýdi mezgilsiz dep sanaimyz», - dedi Asqar Mamin.
