«Imia Lenina snova i snova,
Povtoriaet velikii narod,
I kak samoe blizkoe slova
Imia Lenina v serdtse jiviot».
Senesiz be, senbeisiz be, Semeidegi estý qabileti buzylǵan balalarǵa arnalǵan mektep-internattyń tárbielenýshileri áli kúnge deiin, elimizdiń Táýelsizdik alǵanyna 30 jylǵa jýyqtasa da osyndai shýmaqtardy oqyp, jattaýǵa májbúr bolyp keledi. Muny jaqynda oblysymyzǵa jumys saparymen kelgen Memlekettik qyzmet isteri jáne sybailas jemqorlyqqa qarsy is-qimyl agenttiginiń janynan qurylǵan respýblikalyq arnaiy monitoringtik toptyń músheleri anyqtady. «Meniń sózime senbessizder bálkim. Biraq shyndyǵy osy, balalarymyz «Otanymyz - KSRO, eldiń basty qalasy – Máskeý» dep jazylǵan oqýlyqpen oqyp jatyr», - degen-di respýblikalyq arnaiy monitoringtik toptyń tóraiymy Aigúl Soloviova Óskemende ótken jiynda.
Respýblikalyq arnaiy monitoringtik toptyń múshesi Qoblanbek Qojin óziniń feisbýktegi paraqshasynda osy jáitke qatysty internat tárbielenýshileriniń ata-analardyń birinen shaǵym túskenin jazypty.
«Nasha Rodina – Sovetskii Soiýz», «Vezde i vo vsem imia Lenina s nami» - Semeidegi estý qabileti buzylǵan balalarǵa arnalǵan internattyń balalarynyń oqityny – osy. Olar Sovet zamanyndaǵy, 1983 jyly shyqqan oqýlyqtarmen oqýǵa májbúr. Óitkeni, jańa oqýlyqtar joq. Ókinishke qarai biz ázirge múmkindigi shekteýli balalarǵa ne qazaq, ne orys tilinde zaman talabyna sai birde-bir oqýlyq shyǵara almadyq», - dep pikirin bildiripti respýblikalyq arnaiy monitoringtik toptyń múshesi Raqym Oshaqbaev óziniń feisbýktegi paraqshasynda.
Shynymen, oqýlyq jetpei jatyr ma? Bul tarapta qandai túitkilder bar? Máseleniń anyq-qanyǵyna kóz jetkizeiik dep oblystyq bilim basqarmasyna habarlasqanymyzda ondaǵylar Bilim ministrliginiń 2017 jylǵy 27 shildedegi №352 buiryǵymen mekemedegi sabaqtar jańartylǵan bilim mazmunyna sáikes oqytylatynyn, al 1987 jyly shyqqan «Razvitie rechi» oqýlyǵyn pedagogtar orys tili men oqý sabaǵyna qosymsha jattyǵý retinde paidalanylatynyn jetkizdi.
«Mektepke deiingi daiarlyq tobyndaǵy sabaq jalpy bilim beretin mektepterdiń 1-10 synyptarǵa arnalǵan oqýlyqtary (2000-2016 jyldary shyqqan) negizinde júrgiziledi. 2018 jyldyń 1 qańtarynan 5-7 synyptarda orys tili, himiia, biologiia, algebra, geometriia pánderi 2017 jyly shyqqan jalpy bilim beretin oqýlyqtarmen oqytylyp jatyr», - delingen oblystyq bilim basqarmasy basshysynyń mindetin atqarýshy Sairangúl Jumádilovanyń Bilim jáne ǵylym ministrliginiń jalpy jáne orta bilim departamentine bergen jaýabynda.
Túiin
Oblystyq bilim basqarmasy Bilim ministrligine bergen jaýabynda ideologiialyq turǵydan ábden eskirgen, búgingi zaman talabyna múlde sáikes kelmeitin oqýlyqtardyń aldaǵy ýaqytta internattyń oqý baǵdarlamasynan alynatyny-alynbaityny jaiynda sóz qozǵamapty. Álde «qosymsha retinde» odan ári oqytyla bere me? Degenmen de Bilim ministrligi atalǵan jáitke jiti nazar aýdaryp, tiisti sheshim qabyldaidy dep úmit etemiz.
Azamat Qasym,
"Egemen Qazaqstan", ShQO
