Semei qalasynda sýǵa batyp bara jatqan qyzdy qutqaramyn dep kóz jumǵan 14 jastaǵy jetkinshektiń ata-anasyna medal berildi, dep habarlaidy "Ult aqparat".
ShQO TJD baspasóz qyzmetiniń málimetine súiensek, 29 shilde kúni QR Tótenshe jaǵdailar ministriniń buiryǵymen Áshimjanov Nurjigit Qýanyshuly qaitys bolǵannan keiin «Sýǵa batqandardy qutqarǵany úshin»medalimen marapattaldy. Marapattaý rásimin Semei qalasynyń Tótenshe jaǵdailar basqarmasy bastyǵynyń mindetin atqarýshy Ernar Jalelov ótkizdi. Óz sózinde ol balanyń ata-anasyna kóńil aityp, batyr uldy tárbielegenderine alǵys bildirdi.
«Oqiǵa 30 maýsym kúni bolǵan. Nurjigit dostarymen Ertis ózeniniń jaǵasynda demalyp júrgende sýǵa batyp bara jatqan qyzdy kórip qalady. Ózi júze almasa da, ony qutqarý úshin sýǵa sekirgen. Júzip jetedi de qyzdy jaǵaǵa qarai iterip jiberdi. Osylaisha, qyz aman qalǵan. Alaida Nurjigittiń sýdan shyǵýǵa shamasy jetpedi. Ony esinen tanyp qalǵan kezde sol mańdaǵy kýágerler alyp shyqty», - dep habarlady vedomstvo ókilderi.
Jedel járdem qyzmetkerleri kelip jetken soń jetkinshekke reanimatsiialyq sharalar qoldanǵanymen, ony qutqarý múmkin bolmady.
