Foto: depositphotos.com
Semeide memlekettik qyzmetkerler qyzmettik kólikti jeke maqsatta paidalandy degen kúdikke ilindi. Kýágerler kólikter monsha, saýna, kafe, meiramhana mańynda turǵanyn kórgen, - dep habarlaidy Tengrinews.kz saity abainewskz portalyna silteme jasap.
QR Memlekettik qyzmet isteri agenttiginiń Abai oblysy boiynsha departamenti memlekettik qyzmetshilerdiń sońǵy eki aida memlekettik organdarǵa tiesili qyzmettik kólikterdi jumys ýaqytynan tys jeke maqsatta paidalanýyna qatysty jeke jáne zańdy tulǵalardan 10-nan asa ótinish túskeni týraly aqparatty bólisti.
"Alynǵan aryzdarda Semei men oblys aýdandarynda demalys jáne mereke kúnderi qyzmettik kólikterdi paidalaný derekteri kórsetilgen. Kýágerler bul jaǵdailardy videoǵa túsirip, kólikterdiń monsha, saýna, kafe, meiramhana jáne t.b. mańyna qoiylǵanyn kórsetti", - dep habarlady vedomstvo.
Qandai memlekettik organdar jumys ýaqytynan tys ýaqytta qyzmettik avtokólikterdi paidalanatyny týraly aqparatty anyqtaý úshin vedomstvo Abai oblystyq PD jáne basqa da quzyrly memlekettik organdarǵa jazbasha saýal joldady.
"Shaǵymdardy qaraý qorytyndysy boiynsha, departament zańnamaǵa sáikes sharalar qabyldap, kináli laýazymdy tulǵalardy tártiptik jaýapkershilikke tartý máselesi qaralady. Memlekettik múlik tek maqsaty boiynsha paidalanylýy tiis. Memlekettik qyzmetshiler tarapynan zańsyz áreketter jasaý qoǵamda teris kózqaras týǵyzyp, halyqtyń memlekettik organdarǵa degen senimin joǵaltýǵa alyp keledi", - dep tolyqtyrdy Abai oblysy boiynsha MIAD.
Memlekettik qyzmetshilerdiń qyzmettik qajettilikke bailanysty jumys ýaqytynan tys jáne mereke kúnderi jumysqa kirýi olardyń kelisimi negizinde jumys berýshiniń tiisti aktisimen rásimdeletini atap ótilgen.
