Semei qalasyndaǵy kóppáterli turǵyn úi otqa orandy, dep habarlady "Ult aqparat".
Qalalyq TJB baspasóz qyzmetiniń málimetine súiensek, 20 sáýir túngi saǵat 02.00 shamasynda Melkombinat kóshesindegi ekiqabatty turǵyn úide órt shyqqany jaily habar túsken. Anyqtalǵandai 18 páterli úi tóbesiniń aǵash qurylymdaryn jalyn sharpydy. Saldarynan ekinshi qabattaǵy 4 páterdiń tóbesi qulaǵan. Tilsiz jaýdyń jalpy aýmaǵy 250 sharshy metrdi qurady.
«Sol jerden 39 adam evakýatsiialandy, onyń ishinde 9 bala bar. Zardap shekkender bolǵan joq. Bul úide 41 adam turady», - dep habarlady vedomstvo ókilderi.
Órt saǵat 05.28-de tolyqtai sóndirildi. TJB ókilderiniń dereginshe, tilsiz jaýdyń kesirinen qazirgi ýaqytta 11 otbasy baspanasyz qalǵan.
