Semei qalasynda Ulystyń uly kúninde Abai atyndaǵy jańa meshittiń saltanatty ashylýy ótti, dep habarlaidy "Ult aqparat".
Meshittiń qurylysyn 2008 jyly sheteldik investorlar bastaǵan bolatyn. Alaida qarjylyq qiyndyqtarǵa bailanysty olar jobany jalǵastyrýdan bas tartty.
Sol kezdegi jobanyń quny tórt million dollardy quraǵan. 2010 jyly 100 million teńge bólgen «Qazaqmys» korporatsiiasy meshit qurylysyn jalǵastyrýdy uiǵardy.
Biraq korporatsiia da bul isti sońyna jetkize almaǵan.
Segiz jyl boiy semeilikter meshit qurylysyna bei-jai qaramai, jumystyń jandanýyna tilekshi boldy.
Meshit jobasy osy ýaqytqa deiin birneshe ret ózgergen.
2018 jyly qurylysty aiaqtaýǵa kásipker Dýlat Tastekeev kiristi. Óz qarajatymen jumysty qaita jandandyrǵan kásipker bastalǵan isti sońyna deiin jetkizgen.
Nátijesinde búgin qaladaǵy eń úlken dini nysan boi kóterip, saltanatty túrde ashyldy.
«Jańa tórt munaraly meshitke uly aqyn Abai aty berildi. Syiymdylyǵy - 2 500 adam. Altyn jalatylǵan munaralardyń biiktigi 37 metrdi quraidy. Túrkistan ákimdigi Abaidyń 175 jyldyǵyna arnalǵan is-sharalar aiasynda onyń aýmaǵyn abattandyrǵan. Olar bul jobaǵa 600 million teńge bóldi. Meshit ǵimaratyna irgeles 47 myń sharshy metr abattandyrylyp, eki jerústi kópir salynyp jatyr. Sondai-aq 500 avtokólikke arnalǵan turaq qarastyrylyp, 200 sham ornatylǵan», - dep habarlady Semei qalalyq aqparat ortalyǵy.
Ashylý saltanatyna QR Bas múftii Naýryzbai qajy Taǵanuly, din ókilderi men qala basshylyǵy qatysty.
Qala ákimi Nurymbet Saqtaǵanov qurylysqa atsalysqan barlyq janǵa alǵys aityp, semeilikterdi kópten kútken meshittiń ashylýymen quttyqtady.
Shahar turǵyndaryn quttyqtaýǵa ataqty aqyn Muhtar Shahanov pen teatr jáne kino rejisseri Asanáli Áshimov te keldi.
«Búgingi shara Naýryz meiramymen tuspa-tus kelip otyr. Semeilikter úshin bul úlken qýanysh. Meshit qurylysy uzaqqa sozylyp, biraz ýaqytqa toqtatyldy. Dýlat Tastekeevtiń arqasynda qurylys qaita jandanyp, búgin onyń ashylýyn atap ótýdemiz. Barshańyzdy Ulystyń uly kúnimen quttyqtaimyn», - dedi QR Bas múftii Naýryzbai qajy Taǵanuly.
Dýlat Tastekeevtiń aitýynsha, qurylysty ótken jyldyń tamyz aiynda Abaidyń 175 jyldyǵyna orai aiaqtaý josparlanǵan edi.
Biraq koronavirýs pandemiiasyna bailanysty jumys kesheýildegen.
«Meshit qurylysy eki jarym jyl júrgizildi. Biz qurylysty alǵash bastaǵan kezde ony eki jyl ishinde aiaqtap, 2020 jyldyń tamyzynda, hakim mereitoiyna orai ashýdy josparladyq. Alaida, álemdik pandemiia jumysqa áser etpei qoimady. Sondyqtan qurylys taǵy jarty jylǵa sozyldy. Soǵan qaramastan, biz bastalǵan isti sońyna deiin jetkize aldyq. Kún men tún teńelgen qasietti kúni sizdermen birlesip meshitti saltanatty túrde ashyp jatyrmyz. Bul men úshin jáne búkil Semei úshin úlken qýanysh. Óitkeni semeilikter bul meshittiń ashylýyn on jyldan astam ýaqyt kútti. Osy jyldar ishinde talai merdiger ózgerdi. Al bizdi meshittiń taǵdyry alańdatpai qoimady. Semeidiń damýyna óz úlesimizdi qosqanymyzǵa óte qýanyshtymyz», - deidi Dýlat Tastekeev.
