QR Energetika ministri Maǵzum Myrzaǵaliev Májilis qaraýynda jatqan Semei poligony týraly zań jobasyna qatysty pikir bildirdi, dep habarlaidy QazAqparat.
Ortalyq kommýnikatsiialar qyzmetinde ótken brifingide vedomstvo basshysyna osyndai mándegi suraq qoiyldy.
«2015 jyly Energetika ministrligi Semei poligonynyń jerin aýyl sharýashylyǵy maqsatta paidalanýǵa tyiym saldy. Biyl aimaqtaǵy kóptegen aýdandarda aýa men sýdyń jaǵdaiy adamdarǵa qaýip tóndirmeitini týraly habarlandy. Bul Semei poligonynyń jerin paidalanýǵa salynǵan tyiymnyń alyp tastalatynyn bildire me?», - dep surady BAQ ókili.
Ministrdiń sózine qaraǵanda, atalmysh máseleni retteitin zań jobasy QP Parlament Májilisiniń qaraýynda jatyr.
«Qazir Májiliste bizdiń ministrlik jańadan jasaǵan zań jobasy talqylanyp jatyr. Bul osy Semei poligonyn retteitin zań jobasy bolmaq. Biz tiisti taldaý jumystaryn júrgizdik. Sol taldaýdyń faktilerine súiensek, jalpy Semei poligonynyń kólemi 18 myń sharshy shaqyrymdy quraidy. Sonyń jartysy aýyl sharýashylyq maqsatta paidalanýǵa berýge bolatyn nemese taza telimder degen sóz. Iaǵni, osy zań jobasy Májilis pen Senattan ótkennen keiin kórsetilgen telimder paidalanýǵa beriledi degen úmitimiz bar», - dedi Energetika ministri.
