Ashat Tólepbergenov kezinde Semei iadrolyq poligony aýmaǵynda áskeri mindetin ótegen. Búginde 70-ke kelgen ardager iadrolyq aimaqta densaýlyǵyn sarp etken áskerilerge memleket jaǵdai jasap, arnaiy mártebe berse degen tilegin bildirdi, dep habarlaidy QazAqparat.
«Men Semei poligonynda 1970-1972 jyldary áskeri boryshymdy ótedim. Búginde bizdiń oblysta poligon aýmaǵynda áskeri mindetin ótegen 170 sarbaz bar. Bul resmi tirkelgen sarbazdar, al naqty sany belgisiz. Sebebi 50 jasqa tolǵan soń, bizdi áskeri tizimnen shyǵaryp tastaidy. Bizdiń óńirdegi 170 adamnyń 25-i ǵana tiisti áleýmettik tólemdi alady. Kómek bárine birdei berilse deimiz, jasymyz bolsa 70-ke keldi, endi qashan kómek alamyz?» - dedi SQO Semei poligony qoǵamdyq birlestiginiń tóraǵasy Ashat Tólepbergenov.
Onyń aitýynsha, Semei poligony aýmaǵynda áskeri mindetin ótegenderdiń deni túrli aýrýǵa shaldyqqan.
«Bizge jumysqa ornalasý jaǵy da qiyn. Óitkeni árkimniń syrqaty ártúrli, onyń ústine eńbek jasynan asyp baramyz. Kóbisi Semeide áskerde bolǵandardy Chernobyl oqiǵasymen salystyryp jatady. Chernobyl ol tabiǵi apat, al Semeide arnaiy túrde 40 jyldai iadrolyq synaq júrdi. Bul eki oqiǵany salystyrýǵa bolmaidy. Sondyqtan bizdiń máselemizge mán berilip, jaǵdai jasalsa degen talap-tilegimiz bar. Onyń ishinde turǵyn úimen qamtý, áleýmettik tólem, ońaltý ortalyqtaryna joldama. Sonymen qatar bizge «ardager» mártebesi berilse degen talap bar», - deidi ol.
Buǵan deiin habarlaǵanymyzdai Semei poligonynda áskeri boryshyn ótegender «ardager» mártebesin surap otyr.
