Aqynnyń 175 jyldyq mereitoiy qarsańynda qaladaǵy 56 mekteptiń oqýshylaryna Abai shyǵarmalaryn tereń uǵynýǵa úlken múmkindik týdy. Atalǵan mektepterde «Abai álemine saiahat» klýby ashyldy, dep habarlaidy "Ult aqparat" Semei aqparat ortalyǵyna silteme jasap.
Klýbtyń maqsaty - jas urpaqtyń boiyna elin súiýdiń rýhani dánin sińirý. Klýbty qurýshylardyń pikirinshe, «Abai álemine saiahat» jastardyń boiynda ulttyq biregeiliktiń sanaly túrde qalyptasýyna yqpal etedi. Eń aldymen halqyńdy súiý, ana tilińdi bilý, ulttyq dástúrlerdi bar sana-sezimińmen qabyldaý, ulttyq sana jaily túsinik qalyptastyrý, árine, Otanyńdy, óz otbasyńdy qadirlei bilý. Osyndai asyl qasietterdi aqyn óziniń óleńderi men shyǵarmalarynda, qara sózderinde tynbai nasihattady.
Klýb músheleri jumys barysynda Abai óleńderinen 70 sóz, qara sózderinen 45 oi-tujyrymdy jatqa bilýi tiis.
Atalǵan klýb birinshi ret ótken jyldyń 20 qarasha kúni T. Amanov atyndaǵy orta mektepte ashylǵanyn aita ketý kerek. Onda klýbtyń mereitoiyna orai «Abai dep soqqan júrekter» degen atpen qalalyq seminar ótken edi. Seminarǵa qala mektepteriniń muǵalimderi, ata-analar, barlyq oqý ordalary direktorlarynyń orynbasarlary qatysty. Kezdesýde «Men bir jumbaq adammyn, ony da oila» degen taqyrypta sheberlik saǵaty, «Aqynnyń qara sózi-jeke tulǵanyń qalyptasyýyndaǵy jolbasshy» atty Abai álemine tereń boilaýǵa baǵyttalǵan jobalyq oqý ótken. Sol basqosýda Abaidyń ádebi memorialdyq mýzeii jáne Abai atyndaǵy kitaphana «Abai - dana, dara tulǵa» atty ekspozitsiia kórsetildi.
Búginde «Abai álemine saiahat» klýby músheleriniń sany kún sanap artyp keledi. Abai eńbekterine degen qyzyǵýshylyq tek munymen ǵana shektelip qalmaq emes. Shyǵys Qazaqstan oblysy oqý oryndarynda «Abaitaný» kýrstary engizildi. Aqynnyń týǵanyna 175 jyldyq mereitoiyn ótkizý boiynsha qoǵamdyq keńestiń otyrysynda 10 qańtardan bastap oblys mektepteriniń 5-8 synyptarynda, kolledjderdiń «Qazaq tili men ádebieti muǵalimi» mamandyǵy boiynsha oqyp jatqan birinshi kýrs oqýshylaryna «Abaitaný» elektivti kýrsy engizilgeni aityldy. Oblystyń 277 mektebi men eki pedagogikalyq kolledjinde «Abaitaný» kabinetteri ashyldy.
«Abai álemi» ádebi jobasyn iske asyrý jalǵasýda. Qazaq jazýshylarynyń shyǵarmalary engen qazaq, aǵylshyn, orys tilderinde shyǵatyn 21 myn danamen taraityn 20 kitaptyń tizimi bekitildi. ShQO-da - 500, Ulybritaniiada, Reseile, Túrkiiada, Polshada, Qytaida - 24 halyqaralyq, jiyrmaǵa jýyq shara respýblikalyq deńgeide ótkiziledi dep josparlanǵan. Olardy uiymdastyrýǵa óńirdegi JOO, ǵylymi jáne mádeni uiymdar, QR Jazýshylar men sýretshiler odaǵy, ÚEU, jastar tartylady.
Osy sharalardyń barlyǵy ǵasyrdan astam ýaqyt ótse de Abai eńbekteriniń ózektiligi, mańyzy kúni búginge deiin joiylmaǵanyn, adamzat órkenietiniń shamshyraǵy bolyp jasai beretin asa qundy mádeni mura ekenin aiqyndai túspek.
